مجال التحاليل الطبية فى ايجاز وتجربة شخصيه -علومنجى دوت كوم-

دا موضوع هنتكلم فيه عن مجال التحاليل الطبية فى ايجاز وتجربة شخصيه لدكتور ابراهيم رضا خريج جامعة طنطا والحاصل على دبلومة الكيمياء الحيويه جامعة عين شمس.

نصيحة اي حد كان ايام الكليه بيكبر دماغه ويقعد في السيكشن ويكبر دماغه وبياخد النتايج من زميله ومعلش مش عنده ضمير بلاش يدخل التحاليل لان نتيجتك هنا المره دي بتتحكم في تشخيص مريض.

اتخرجت ومعندكش اي خلفيه غير معلومات الكليه اعمل ايه؟ اولا لو انت Biochemistry أو Microbiology أو حتى لو double course فأنت بدايتك سهله .

الأساس عندي في التحاليل اربع أقسام:

Biochemistry
Microbiology
Immunology
Hematology

1- احنا كخرجين علوم الحمد لله الاكثر كفاءة فى اول اتنين .

2- الاتنين الباقين دول لخريجى علوم اللى عمل دبلومة او ماستر فى المناعه او الهيماتولوجى ولخريجي طب كلينكال باثولوجي.

ملحوظة: لو هتفتح انا معمل بيكون في واحد من دول.

انت بتحاول تشوف اي طريقه تدرب بيها في أي معمل أو مستشفى
وانت بتدرب في نفس الفترة حاول تحضر دبلومه كيمياء حيويه (وفي جزئيه الدبلومه هقول ايه أفضل جامعه):

طيب التدريب في الحكومه
هتحتاج تكون المستشفى الحكومي اللي هتحاول تدربك على مستوى عالي يعني لسه متجدده دا لو رضيت تدربك يعني وبيكون فيها كل حاجه تتمناها بالاضافه لبنك الدم طبعا وشغل الاليزا.

لو هتدرب في معمل خاصفى الغالب هيقولك هيدربك وتشيل شيفت معاه وفي الحاله دي مش هتدفع فلوس بس هيعرف يستغلك صح صح يعني ولو قالك عقد متوافقش عشان هيربطك جمبه.
طيب لو لاقيت معمل عامل تدريب وسعره معقول ... انزله هتتعلم منه وهتقف وتشوف ازاي الشغل والأجهزة وهتستفيد جدا جدا انما الكورسات اللي تبع الجامعة دي والدورات ام 3 ايام دي مش بتاكل عيش ... دي شهادة تتشرف بيها بس.

بالنسبه للسحب:

عادي مش قضيه خالص محتاج فهم وتركيز وتشيل رهبه انكهتضرب حقنه في دراع مريض ويفضل تتعلم اول مره حد أوردته حلوه عشان تكتسبثقه في نفسك ومره ورا مره هتتعلم .

طب انا مره وانا بسحب مجبتش حاجه والمريض اتضايق اعمل ايه؟

عادي وارد جدا بس المهم اوعي تتهز قدام المريض... ممكن يكون اتهز وحرك ذراعه فأنت دخلت جمب الوريد أو انت اخترت وريد ضعيففطلع نقطتين ووقف أو انت ثقبت الوريد وعديت منه وارد اسباب كتير ...المهم انك وانت تسحب تحاول تكلم المريض بتعمل التحليل ليه حضرتك خد نفس  ..متخافش .... اتنفس عادي .... متبصش .... متركزش معايا وانا بسحب ... شيل التوتر عنده وعندك.
احسن دكتور ساعات مش بيعرف يسحب ووارد يكون المريض obies والاورده صعبه .. مع الوقت هتكتسب ثقه.
.....................................................
طيب جوا المعمل اية الموجود:
اولا شغل الكيميا بقى وكده:الكيميا هتتعود عليها وسهلة جدا في الأول هتحتاج سكيم على ما تتعود على الكميات يعني هتاخد كام من الكيمياويات على السيرم أو العينه يعني ودا انا عامله سكيم لطيفة ظريفة هتلاقيها في Data فى الاخر مع الوقت هتحفط الكميات وضروري أويابص على البامفلت اللي مع الكيتس هتفرق معاك في فهمك التحاليل.

الاجهزه فى الغالب بتكون semi automated الا لو معمل كبير واشتغلت في unite الكيميا فى بيكون fully automated فأنت ف الحاله دي بتكون متفرج.
.....................................................
ثانيا شغل الهيماتولوجي :

وارد لحد فينا انه يتعرض له أو لو فتح معمل اكيد هيعملتحاليل هيماتولوجي ... يعني لو معمل عادي فى لو مش عنده جهاز CBC فبيعمل الهيموجلوبين مانيوال علي جهاز الكيميا وبيعد   RBCs  والـ WBCs والصفائح ويحسب الباقي بالقانون وهتلاقي القوانين كلها في Data ... وفي ايضا تحاليل السيولة الي هي PT , PTT من التحاليل الشائعة جدا جدا في الغالب بتتعمل مانيوال اولو معمل نضيف وعنده رات عالي فبيكون عنده جهاز للسيولة وهتلاقي كل حاجة في Data.

.....................................................

ثالثا شغل البارا:

 اللي هو ال urine وال stool مفهوش كلام كتير بس هتلاقي الصور في الاطلس والداتا فيها حاجة حلوه عن الـ  urine.
.....................................................

رابعا شغل الهرمونات ودلالات الاورام كده:

ودي في الغالب بتتبعت لاب تو لاب الا لو اشتغلت وربنا كرمك في معمل كبير في وحدة الـ  Hormones.

وهنا هتكلم عن الدبلومه:
أفضل الجامعات
الاسكندريه وعين شمس وشبين ... طيب حضرتك أفضل من ناحيه ايه؟؟
اولا معتمده لدى النقابه والوزراه عشان ترخيص المعمل
ثانيا كميه المعلومات اللي هتاخدها لا تقدر بثمن هتفرق معاك خالص وهتزود معلوماتك انك تعرف ترد علي اي حد يتكلم معاك ولا يشكك في نتيجتك ... انا عن نفسي اخذتها من عين شمس 2015 ومكنتش قريبه مني كانت رايح جاي 6 ساعات سفر بس اتحملت عشان النتيجه تستحق.

يعني هي لازم اخد دبلومه اصلا؟؟ ... اه لازم جدا جدا والا هتبقى تعتبر شغال زيك زي اي حد بيعمل حاجات روتينيه.
.....................................................

طيب الراتب :
الراتب في التحاليل عموما ضعيف شويه الا لو هشيل شغل في القاهره ومعاك خبره سنه ع الاقل في مستشفى نضيفه نظام 12 ساعه الراتب هيوصل ل 3000 ج وأحيانا 4000 ج .

طيب لو شغل عادي شيفت 6 ساعات مثلا لسه بادئ معييش خبره في الغالب هيقولك 600 جنية  ... اه هيستغلك لأنك معندكش حاجه تديهاله هو بيعتبرك فى الاول عبء لحد ما تثبت نفسك ووقتها اشترط مرتب كويس أو شوف مكان تاني افضل.

طيب لو وصلت لخبره سنه وشفت 7 ساعات مثلا ... هنا الراتب هيوصل لـ 1200 أقاليم يعني طنطا الزقازيق منوفيه منصوره كده يعنيولو القاهره في 1800 وفي 1600 وقابله الزياده ع حسب شيفت قد ايه.
والأفضل ليك لو معاك خبره أنك تتفق بالساعه بلاش بالشيفت ... يعني بصراحهحرام اي مكان تشتغل فيه وخبرتك سنه مثلا وتقبل الساعه أقل من 10 جنية دي كدهمعقولة... بس الاستغلال وأصحاب المعامل بيوصلها لحد 5 و 5.5 والافضل ليك انك تحاسب بالساعه اشتغلت 100 ساعه وله 150 وله 400 ساعه حتى تتحاسب عليها.

اخيــــــــــــــــــــــرا دي لينكات الداتا:

اول لينك هو الكتاب الخام (مرجع) اللي كنا بندرس فيه في الدبلومة حوالي 750 ورقه.

تاني لينك بقي هو الاطلس الملون اللي فيه صور الهيماتولوجي والـ urine  والـ  stool.

تالت لينك والاخير وهو فيه الداتا اللي انا ملخصها من كتاب بتاع الدبلومة متقسمه لكذا حاجة وهي الهيماتولوجي ووظائف الكبد والكلي والقلب والدهون والسكر والامراض المناعة وهكذا بالاضافة للاسكيم.

فريق الموقع بيشكر د ابراهيم رضا على هذه المعلومات الجميلة اللى قدمها من وجهة نظره.