كل شئ عن كليه علوم "كل ما يخص كليه العلوم"(مقرراتها واقسامها ومجالات شغلها) -علومنجى دوت كوم-

الموضوع الشامل عن كلية العلوم لجميع جامعات الجمهورية لكل ما تريد ن تعرفه عن أقسام كلية العلوم وموادها ومجالات شغلها والموضوع يتم تحديثه باستمرار واللى عنده سؤال يكتبه فى كومنت وهنرد عليه فالكثير منا لايعرف ما هى كليه العلوم وما يدرس بها من مواد وما هى اقسامها ومجالات شغلها ... إلخ إلخ ولكن يجب علينا ايضاح كل المعلومات المطلوبه لمن يريد ان يعرف .

الفهرس
1.ما هي الاوراق اللازمة للدخول الجامعة؟
2.تعريف الكليه
3.أقسام الكليه
3.3.لماذا لا نرجح لك دخول الاقسام الخاصه؟
4.موضوع الساعات المعتمده
1.4.الفرق بين نظام الساعات ونظام قديم؟
2.4.التحويل من كلية نظام قديم لكلية نظام ساعات معتمدة؟
5.نظام الدراسه
6.التقديرات
7.السمر كورس (الترم الثالث)
1.7.أسعار السمر كورس بجميع الجامعات؟
8.تدريب الفرقه الثالثه
9.الغياب
10.هل ممكن تكمل صيدلة او طب؟
11.الشغل
12.إزاى ممكن تشتغل مدرس
13.بالنسبة للتحويل بين الجامعات؟؟
14.المواد الدراسيه
15.موضوع التظلم
16.كيفيه التحويل من القسم بعد مرور عام
17.أيه نظام الاستماع

 

ما هي الاوراق اللازمة للدخول الجامعة؟

8 صور شخصية

نموذج 2 جند من مكتب التجنيد  ولو انت مأجل أو مواليد 95 يبقى هتجيب 6 جند كمان

صورة شهادة الميلاد الاصلية

بيان النجاح بالثانوية العامة الاصلى

بطاقة الترشيح من موقع التنسيق

"كلمة موجهة من فريق علومنجى دوت كوم لطلاب الفرقة الاولى كلية العلوم"

انا زيي زي اي حد فيكم كلنا من الصعب ان حد فينا يكون كان نفسه يدخل علوم (فى بلد مش بتعرف يعنى ايه علوم بالاضافه اننا دايما حاطيين ادمنا موضوع الشغل على الرغم من انه رزق مش اكتر لكن فى عدد قليل جدا تقدر تقول داخل بمزاجه وعدد مش كبير حب الكليه بعد ما دخلها) لكن بعد ده كله هنا فى مصر كانت و ما زالت كليه الي رقصوا علي السلم الي كان نفسهم يدخلوا ما يسمي في مجتمعاتنا المتخلفه بكليات القمه و تفوقوا في الثانوي بس مجموعهم ما ساعدهمش فبدأوا يدوروا علي بدايل فملاقوش غير علوم و هنا اول نصيحه انك لازم تقتنع ان دي كليتك الي ربنا قسمهالك و ان فيه خريجين علوم كتيييييير جدا بيتحسدوا من خريجين كليات القمه علي شغلهم و مراكزهم و مرتباتهم و كمان كل الطلبه داخلين تقريبا بنفس المجموع يعني المستويات متقاربه جدا فمافيش ما يمنع من التفوق و انك تكون من المعيدين و الدكاتره في كليه العلوم و اعتقد هتكون كده افضل من اي دكتور عادي خريج طب او صيدله طبعا بس ازاي ده يحصل ؟؟ هنا هتلاقي ان الي تقبل بسرعه كونه دخل علوم و ما اعتبرش ده فشل و ركز في كليته و ماضيعش وقته في التحسر علي كليات القمه هو الي بيقدر يتفوق لكن الي مخلي علوم بيتقال عليها انها صعبه ان الطلبه عقبال ما بيرضوا بالامر الواقع بيكون فات فتره من الترم و بيحاولوا يلموا الي فاتهم مبيلحقوش فبنلاقي نسبه سقوط مش قليله بعكس طلاب ما يسمي بكليات القمه الي داخلين مبسوطين بكلياتهم بيركزوا من الاول.

كان في سؤالين بتسألهم من 90 % من الطلاب الي كنت بستقبلهم في الكليه : الاول ازاي اقدر احول من علوم لصيدله بعد سنه تانيه؟؟ و التاني ادخل قسم ايه علشان افتح معمل تحاليل؟؟

كان السؤالين بيني و بينكم بيضحكوني جدا ليه؟؟؟ علشان لو ركزتوا فيهم هتلاقوا اللي بيسأل مازال متعلق بكونه يبقي دكتور حتي بعد ما دخل علوم لانه اتزرع جواه من صغره ان الي مدخلش طب او صيدله او اسنان او هندسه يبقي فشل في التعليم و ان ابن خالته الدكتور فلان احسن منه .

انا عارف ان معظمكم دلوقتي مستني الاجابه علي السؤالين دول برضه :

الي اقدر ائكدهلكم ان انا و كتيييييييييييير جدا من زمايلي لو رجع بينا الزمن تاني و كنا جايبين 100 % هنختار علوم بكامل ارادتنا لكن هيتغير طموحنا فى الميل لاقسام علوم مش اكتر و ده ما يمنعش ان ناس كتير جدا برضه ممكن تقول عكس كده بس ده راجع لتوفيق ربنا اولا ولشخصيه الانسان و محاولته انه يدور و يتعب و يطور نفسه.

و لازم كلنا نكون عارفين ان علوم في اي دوله تحترم نفسها هي الكليه رقم واحد و ان سبب تخلف دول العالم الثالث (الشرق الاوسط كله) هو عدم الاهتمام بالكليه دي فلازم تكونوا فخوريين بكليتكم الي هيجي اليوم قريب جدا ان شاء الله و تاخد دورها بجد في نهضه مصر.

اما بالنسبه للاقسام و نظام الكليه فسامحوني مش هقدر اتكلم عنه كتير لكن نصيحتي المتواضعه هي حاول تتخرج من الكليه و معاك كيمياء في تخصصك سواء سبيشيال او مزدوج و جميع اقسام الكليه بتأهلك لده و ان سوق العمل فعليا مش بيفرق اوي بين اقسام الكليه زي ما كنا فاكرين .

لازم تقول لنفسك الاتى انا بذاكر واتعلم مش علشان الفلوس بس ,الفلوس هاتيجي هاتيجي لكن خليها هي اللي تجيلك مش انت اللي تجري عليها,احنا بنذاكر وندخل احسن الكليات علشان نتعلم ,تعرف ان معظم العلماء لا يملكون المال ولكنهم يمكلكون علما لا يشترى بمال الدنيا ,العلم في حد ذاته غاية نبيلة وليست وسيلة لكسب المال مع ان المال هايجي لغاية عندك يا سيدي ما تقلقش.

و فيه جمله مش بنساها ابدا قالتها دكتوره خلوها قدامكم دايما: "لازم الواحد يعتبر نفسه لاعب في الالعاب الاوليمبيه هدفه هو تحطيم الارقام القياسيه و ليس الحصول علي المركز الاول بس علشان لو فشل يحصل علي المركز الاول بدون تحطيم الرقم القياسي"

و فيه جمله مش بنساها ابدا قالهلنا دكتور خلوها قدامكم دايما: "أعرف شئ عن كل شئ وكل شئ عن شئ"

"يعني حاولوا كلكم ترفعوا من سقف طموحكم و مرحبا بكم في كليه العلوم"

(^_^)


شاهد تنسيق كلية العلوم بجميع جامعات الجمهورية : على الرابط التالى 

تعريف الكليه :

هى الكليه التى يدرس بها كل العلوم الحيه والغير حيه الخاصه بالطبيعه من حولنا لا ندرس فيها اى من المواد الادبيه او التاريخيه ونختلف تماما عن كليه دار العلوم والدراسه فيها باللغه الانجليزيه بمعظم الجامعات ولكن فى بعض الجامعات الدراسه فى سنه اولى باللغه العربيه والدراسه على اربع سنوات ( ودى نقطه نقاش حاليا ).

وكلية العلوم 4 سنوات دراسية والدراسة فيها بالانجلش وفى بعض الكليات سنه اولى بالعربى وهى تتبع نقابة المهن العلمية ، الحد الادنى من علوم 93.7%  حتى 96% غالبا ، ومن رياضة 79.5%  حتى 90% غالبا حسب تنسيق الثانويه العامه لكل سنه.

أقسام الكليه كالتالى:

ده رابط موضوع شامل عن كل كلية العلوم من جميع جامعات الجمهورية هنتكلم فيه عن نظامها وكمان موادها ومجالات شغلها أقسامها على الرابط التالى

 

اولا: اقسام لطلبة علمى رياضة فقط فى بعض الكليات

1) كيمياء منفرد: الكيمياء عضويه وغير عضوية وحراريه وكهربيه وتحليليه وكيميات كتير بتدرس كل انواع الكيميات بكافه تخصصها انالتيكال وثيرمو والكترو واروماتيك وكيمياء حيويه وكوانتم كل اللي نفسك فيه ، وستريو وبروتين كربوهيداات ، وشغله: فى معامل التحاليل وفي كل شركات مصر مافيش شركه من غير كيميائي من ادويه واسمده ومستحضرات التجميل والشيبسي والبيبسي وغيرها .

2) علوم حاسب منفرد: بتدرس مبادئ البرمجة من النظم العددية والخوارزميات وهياكل البيانات ونظم التشغيل وقواعد البيانات والذكاء الاصطناعى والتشفير وغيرها ، وشغله واسع اوى فى الكمبيوتر والسوفت وير ، هى شبه قسم علوم حاسب فى كلية حاسبات ومعلومات والفرق ان عندنا الاهتمام بالنظرى والرياضة على حساب التطبيق بس لو قدرت تفهم النظرى كويس هيبقي سهل عليك تتعلم اى تطبيق عليه وهتبقي كويس عن اى حد ولازم تاخد كورسات عشان تطور نفسك ، ولو اتخرجت بتقدير جيد تقدر تقدم فى منحة وزارة الاتصالات وبتاخد  جبر واحصاء و جافا وميكانيكا بتدرس مبادئ البرمجة من النظم العددية والخوارزميات وخرائط التدفق ، المتغيرات والجمل ، وهيكليات التحكم: الجمل الشرطية (أدوات الربط والتعبيرات المنطقية والصيغ)، والحلقات ، الدوال و مكتبات الدوال. التكرارية. المصفوفات. المؤشرات و النصوص. الهياكل وشغلها واسع اوى فى الكمبيوتر والسوفت وير ورغم ان حاسبات و معلومات فيها سوفت وير ولكنها احسن لأنها بتدي المواد التطبيقيه في الواقع لكن في علوم حاسب بتاخد نظري كتير ، وشغله:

فى وحدات تكنولوجيا المعلومات فى الشركات والمدارس والجامعات ، مطور برامج ، مصمم او مطور شبكات ، مطور تطبيقات الموب ، مطور جافا ، مصمم قواعد بيانات وغيرها

 (web developer, web designer, java developer, , mobile app developer, php and data base designer, etc) ،

2) رياضيات منفرد: يعني رياضه باحته وتطبيقية يعنى لو بتحب الرياضه جدا ادخله لكن انت كويس فيها مش بتحبها يبقي فكر فى حاجة بتحبها ، قسم الرياضيات تقريب الوحيد اللى عدد مقرراته يٌعتبر الأقل مقارنة بأقسام الكلية التانية ومعظم المواد اللى هتدرسها فى القسم مش صعبة ولكن بتتطلب بذل مجهود من الطالب و نسيان موضوع لم المنهج فى أخر شهر ده ، كل اللى بتتطلبه الرياضيات هو أن الطالب يكون مجتهد ، مش شرط يكون عبقرى زى آينشتين علشان يدرس رياضيات أو يستمتع بعلومها ، شغله: فى المجال الاكاديمي ، معيد سواء فى جامعة حكومية او خاصة، مراكز الاحصاء والمتابعة ، معامل الابحاث ،هيئات الأ رصاد الجوي ، مراكز التعبئة والاحصاء ، مجالات عمل الحاسب الألي ، باحث ، محلل بيانات ، في البنوك ، مسئول قواعد بيانات ، مبرمج في شركات الكمبيوتر او تاخد سنتين تربيه وتبقي مدرس .

4) فيزيا منفرد: قسم عشاق الفيزياء ودراسته فيزيائيات كهربيه وحراريه والدراسة فالقسم عايزة انك تكون معتمد علي نفسك شوية بالذات في مواد منفرد ، وانه ما يعتمدش فقط على المنهج الجامعي و يشتغل مع نفسه في البحث الخارجي ، والقسم لازم تتخرج منة على الاقل بتقدير جيد جدا عشان تلاقي شغل محترم معيد في اي جامعة خاصة او شغل في هيئة الطاقة النووية ، وفية شغل في مصانع الاجهزه الكهربيه ومصانع الحديد والفحم بيكون فني بيمسك الالات الكبيرة وبيعملها حسابات زي حسابات الديناميكا الحرارية وهكذا، وشغل اكاديمي اكتر من كونة فني يعني باحثين في مراكز البحوث او في مدينة زويل او اعضاء هيئة تدريس فالجامعات او شغل اكاديمي زي باحث في احد الجامعات الاجنبية او سيرن او وكالات الفضاء بتحتاج فزيائين او المفاعلات النووية بس كل دة خارج مصر لازم تدرس ماجيستير ودكتوراه و ايضا لازم تدور علي منحة عشان تدرس ماجيستير ودكتوراه برة لان الفيزياء من العلوم التقيلة اللى محتاجة تدرسها بره وعلي الاقل عشان تاخد منحة للدراسة فالخارج لازم تكون جايب جيد جدا ، ولو الدنيا قفلت فى وشك تعرف تبقي مدرس فيزياء .

5) كيمياء/فيزياء: قسم يدرس نص مقرراته كيمياء ونصها فيزياء ، وشغله: زي اي قسم بيدرس كيمياء في معامل التحاليل وشركات الادويه والاسمده وغيرها ، وبيشغل في الفيزيا في معامل الابحاث وشركات الالكترونيات والقسم ملهوش .

  6) رياضة/احصاء: نفس الكلام بس بتاخد نص دراستك رياضه ونصها التانى احصاء ، وشروطه: انجح رياضة 1 و 2 .

7) رياضة/علوم حاسب: نفس الكلام بس نص المواد من رياضه و نصها من علوم الحاسب ، شروطه: انجح فى رياضة 2 وجافا.

8) رياضه/فلك: بدرس مواد رياضه و مواد فلك و شغله في مصر في مرصد حلوان ، وشروطه: اختار وانجح جبر وفلك.

9) ( رياضة / فيزياء ): بتدرس نص المواد رياضيات ونصها فيزياء ، بتدرس التجارب والقوانين والعلاقات الرياضيه والدوائر الكهربائيه ، بتدرس فيزياء الليزر وتطبيقاتها وفيزياء علمية وفيزياء حديثة وفيزياء نووية وغيرها ، ( مجالات العمل ): نفس شغل قسمي رياضة منفرد وفيزياء منفرد. 

10) فلك منفرد: بتدرس تاريخ الفلك ، وأرصاد العين المجردة ، النظام الشمسي ، الظواهر الفلكية، حركات الكواكب والنجوم الظاهرية ، والحشود والنجوم وأنواعهم ، المادة بين النجمية ، والمجرات ، نشأة الكون بصفة عامة ، التعرف علي السماء ليلا ، خرائط النجوم ، الكواكب والكويكبات النجمية وطرق التعرف عليها وغيرها كتير ، وهى زي رياضه فلك و نفس المواد الاختياريه ومجالات العمل : فى مرصد حلوان ، مرصد القطامية ، باحث بمركز الاستشعار عن بعد او بالمركز القومي للبحوث الفلكية واي مركز في مصر فيه فيزيا ، هيئة الطاقة الشمسية ، المركز القومي للفلزات ، فى وكالة ناسا الفضائية زي عصام حجى .

11) فضاء منفرد: هو هو فلك منفرد ونفس الشروط والمواد الاختياريه بس الفرق ده فلك وده علوم جويه ونفس الشغل فى مصر .

ثانيا:  اقسام لطلبة علمي علوم فقط فى بعض الكليات

أولا: اقسام البيولوجى للى يتخصص بيولوجى فى سنه اولى

1) كيمياء حيوى و كيمياء/كيمياء حيوي: بيدرس العمليات الحيويه في جسم الانسان زي البروتين والفيتامينات والكربوهيدرات والاحماض النوويه والانزيمات والهرمونات والاورام وشويه بسيطه كده في البيولوجي بتاع الخليه وعلم الوراثه و المناعه وتدرس فيها جميع التفاعلات الكميائيه الخاصه بالكائن الحى وجسم الانسان وتدرس فيها الكيمياء العلاجيه زى المسكنات وخافضات الحرارة ومضادات البكتيريا والفطريات والفيروسات والطفيليات وهى من اقوى الفروع فى الكمياء وتتخصه من بيولوجى ، وشغله: في معامل وشركات التحاليل الطبية وشركات ومصانع الادوية ، ومعاهد الاورام ، ومعاهد السرطان ، ومصانع وشركات المستحضرات الطبية ، ومصانع كتير جدا زي البتروكيماويات ومصانع الخميرة وغيرها ويستحسن تاخد دبلومه التحاليل الطبيه او دبلومة الكيميا الحيوية.

2) كيمياء/كيمياء ميكروبيولوجي: تدرس فيه كل فروع الكيمياء السابقة (حيويه وعضويه وتحليله وفزيائيه ) وايضا تدرس فيه كل فروع الميكروبيولوجى السابقة (البكتريا والفطريات والطحالب والفيروسات) وحياتها وكل حاجه و تأثير الميكروبيولوجي على الانسان والامراض اللي بيسببها والانزيمات والسموم الميكروبية والهرمونات النباتية ، وشغلها : فى معامل وشركات التحاليل الطبية ، وشركات الادويه ، وفى المستشفيات ، وفى معامل المكيروبيولوجي ، وتنقية المياة فى محطات وشركات المياة ، وشركات الاغذية ، شركات الالبان ، شركات الكيماويات ، وله الافضلية فى الشغل هو وقسم الكيمياء الحيوية فى بعض شركات الادوية داخل مصر وشركات الكيماويات وهما الوحيدين المعترف بهم كاخصائيين بعد الماجستير فى التحاليل خارج مصر (السعودية).

3) كيمياء/حيوان: بتدرس نص المواد كيمياء ونصها تبع علم الحيوان ويدرس ما يتعلق بالمملكه الحيوانيه وعلي رائسها الانسان فيدرس الفسيولوجى اي علم وظائف الاعضاء والامبريولوجى اي علم الاجنه والهيماتولوجى اي علم امراض الدم والسيريولوجى اي علم المناعه والاناتومى اي علم التشريح والباراسيتولوجى اي علم الطفيليات والبيولوجي بتاع الحيوان والفيسيولوجي وتشريح و الفقاريات و اللافقاريات وعلم الوراثه والانسجه والاجنه والمناعه ، وشغله: نفس شغل قسم كيمياء منفرد +  الحقن المجهرى ، بنوك الدم ، المراكز الطبية لعلم الاجنة ، مراكز البحوث المختلفه وفى التحاليل الطبيه اذا حضر دراسات عليا في الطفيليات او في الهيماتولوجى اي امراض الدم وممكن يشتغل في اطفال الانابيب اذا حضر دراسات عليا في علم الاجنه وممكن يشتغل في اي مركز من مراكز البحوث المختلفه وغيرها و شركات الادوية وغيرها . 

4) كيمياء/نبات: بيدرس نص مواده كيمياء ونصها من علم النبات ، فيدرس كل ما يتعلق بالمملكه النباتيه بداية من تشريح النبات ومناعه وفسيولجى وسلوك وتقسيم و وراثه والمورفولوجى والبيولوجي بتاع النبات وتصنيفاته والعوامل البيئيه اللي بتأثر فيه و التلوث والانزيمات والطحالب وعلم الوراثه والشكل الظاهرى للنباتات مغطاة البذور، تركيب الزهرة، التلقيح والاخصاب وتكوين البذور، دورة حياة مغطاة البذور، البذور والإنبات، تركيب البذرة، العوامل التى تؤثر على الإنبات والتغيرات التى تحدث خلال الإنبات، نموذج لبذور وبادرات النباتات ذوات الفلقتين والفلقة الواحدة: الشكل الخارجى للنبات:نشأة الجذر ووظائفه - مناطق الجذر المختلفة وتحورات الجذر ، البراعم : نشأتها ووظيفتها وتركيبها) ، (نشأة الساق - الفرع - طبيعة التحورات) ، الأنواع المختلفة للاوراق ووظيفتها – توزيعها- الإفتراق الزاوى - تركيب الأوراق – التحورات) ، علم التشريح النباتى: تركيب الخلية النباتية . مكونات البروتوبلازم و مكونات الخلية غير البروتوبلازمية ، الجدارالخلوى ، النقر، الأنسجة النباتية ، الأنسجة الإنشائية، الأنسجة المستديمة، الأنسجة الوعائية المركبة ، وشغله: نفس شغل الكيمياء + معامل البحوث الزراعيه ، وزارة الزراعة وفي معامل الابحاث والتحاليل وشركات الادويه وغيرهم .

5) كيمياء/حشرات: بتدرس نص المواد من كيمياء ونصها من علم الحشرات ، فبيدرس البيولوجي بتاع الحشرات و تشريح انسجه الحشرات و المورفولوجي بتاع الحشرات و تصنيفات و تقسيمات الحشرات و علم بيئه الحشرات و علم الطفيليات والوبائيات و لتحاليل الطفيليه والفيسيولوجي بتاع الحشرات ومكافحه الافات و لسيطره عليها والمناعه والميكروبيولوجي والباثولوجي للحشرات وعلم السموم الشكل الخارجى والداخلى والأداء الوظيفى للحشرة ، أنماط الحياة ، التأثيرات البيئية والدورة الفصلية ، أشكال التأثيرات المتبادلة فى الآهلات الحيوية المجموعات الهامة للحشرات (الجراد والصراصير، القمل، الذباب، الفراشات وأبو دقيق، الخنافس، الدبابير والنحل، البراغيث ) ، الحشرات النافعة ودورها فى تلقيح النباتات ونشر البذور ، المنتجات التجارية المشتقة من الحشرات ،الحشرات المفترسة والمتطفلة ودورها ، أهمية الحشرات ككانسات ، مركز الحشرات الهامة فى النظام البيئي وغيرها كتير ، وشغله: نفس شغل الكيمياء + مصانع المبيدات الحشرية ، مراكز مكافحة الحشرات ، معامل البحوث الزراعيه ، وزارة الزراعة في معامل التحاليل و الشركات الادويه ومعامل البحوث الزراعيه وغيرها .

6) كيمياء/فيزياء: قسم يدرس نص مقرراته كيمياء ونصها فيزياء ، وشغله: زي اي قسم بيدرس كيمياء في معامل التحاليل وشركات الادويه والاسمده وغيرها ، وبيشغل في الفيزيا في معامل الابحاث وشركات الالكترونيات .

  

7) بيوفيزياء منفرد: البيوفيزياء هي علم قائم بذاته و مختلف عن الفيزياء و الاحياء ، هو يعتبر تطبيق لمباديء الفيزياء وتقنياتها لدراسة تركيب ووظيفة الخلية الحية ودراسة للقوانين الفيزيائية التي تؤثر في الجزيئات الحيوية والعمليات الحيوية ندرس بها الكهربية خلال الجسم الحيوىو الجهاز العصبى والخلية العصبية ، الجهد الكهربى للأعصاب ، رسم العضلات والقلب والمخ والعين ، فيزياء الأشعة السينية التشخيصية ، استخدامات الانويه المشعه فى أجهزه القياس الإشعاعى الأساسية وتطبيقاتها الوقاية من الإشعاع ، وحدات الوقاية الإشعاعية وحدودها فى الطب النووى تطبيقات الحرارة والبرودة ، حفظ الدم والأنسجة والجراحه بالتبريد ، وإستخدام الضوء فى الطب فلها تطبيقات في الطب حيث توفر تفسيراً للعلاقات الوظيفية بين أجزاء الجسم وفي دراسة نظام المناعة ضد الامراض وتم اعتماد أربع تخصصات رئيسية وهى: البيوفيزياء الجزيئية والبيوفيزياء الطبية و البيوفيزياء النظريه و البيوفيزياء البيئية والمدرستين المتخصصتين واللتيان لهما النصيب الكبير من الاهتمام والتطور هما البيوفيزياء الجزيئية والبيوفيزياء الطبيه ، وشغله:
في المستشفيات والمعاهد الطبيه زي الاورام ومعاهد الليزر ومعهد بحوث امراض العيون ، والقصر العيني ، 57357 ، فى مراكز البحوث زي البحوث النووية ، بحوث الاشعاع والاشعاعات واثرها علي الخلايا ، المركز القومى للبحوث ، التصوير الاشعاعى والعلاج الاشعاعي ، شركات الاجهزة الطبية والمناظير وغيرها .

ثانيا: اقسام الجيولوجيا للى يتخصص جيولوجى فى سنه اولى

8) جيولوجيا منفرد: الجيولوجيا هي علم دراسه الارض وأصل الارض وطبقات الارض ،الحاضر مفتاح الماضي ، تقدير عمر الأرض النسبي والمطلق ، الجدول الزمني لتاريخ نشأة الأرض ، الحفريات والتحفر بالتفصيل ، التبلور ، حالات المادة الصلبة ، عناصر التماثل البللوري ، المحاور البللورية ، ثبات الزوايا البينية ، النظم الكاملة للتماثل ، الأنظمة السبعة ، التوأمة وعناصرها ، الخواص الفيزيائية للمعادن، تقسيم المعادن ، مجموعات المعادن النارية والمتحولة والرسوبية بالتفصيل ، التعرف المنهجي علي المعادن ، وشغله: في شركات البترول ، والمياه ، وجهاز شئون البيئه ، وقطاع الاثار ، والمناجم ، الهيئة القومية للاستشعار عن بعد ، علوم الفضاء ، المراصد الجيولوجية ، شركات التعدين والمحاجر.

9) كيمياء/جيولوجيا: بيدرس نص مواده جيولوجيا والنص التاني كيمياء وميزته انه يقدر يشتغل بالاتنين الكيميا والجيولوجيا يعني ماسك العصاية من النص والجيولوجيا زى مااتكلمنا عنها هي علم دراسه الارض وشغل فى صحرا او اوفس نشتغل اوبيريشن وده بقي اللي بيعمل الخرايط مش الجغرافيه لأ خرايط تانيه هتعرفوها قدام ، وشغله: فى معامل التحاليل وشركات الأدوية والمستحضرات الطبية والأسمنت والاسمده والبترول والمياه وجهاز شئون البيئه وقطاع الاثار وغيرها .

10) جيوفيزياء: هي تطبيق لقوانين الفيزياء علي الجيولوجيا اللي هي علوم الارض وهو يدرس الاعماق الارض من الناحيه الفزيائيه وهتدرس فى سنة اولى فى اول مقررين جيوفيزياء 1 و2 مقدمة عامة للجيوفيزياء ومبادئ أساسية عن Gravity  و Magnetic فى الترم الاول و  Electric و Seismic فى الترم التانى ، والجيوفيزيائى اللي هي بيشوف الاستجابه الكهربيه او المغناطيسيه للارض و استخدم موجات السزميك والالكترك والجرافيتي والماجنتيك او غيؤهم عشان اعرف فين المكان الغريب اللي في استجابه مختلفه عن اللي حوليه ، شروطه: اختار جيولوجيا وجيوفيزياء واجيب فيهم جيد والقسم بيدخله 15 طالب فقط الاعلى فى التقدير العام وحطينه رغبة اولى ، وشغله: التنقيب قبل ما احفر عشان اطلع الحاجه سواء فى شركات البترول او المياة او المعادن او الابار او الاثار او اى حاجة من تحت الارض.

ثالثا: 9 اقسام مشتركه متاحة لطلبة علمي رياضه و علمي علوم فى بعض الكليات

لاحظ منها قسما نخاصان تحت

1. ( كيمياء منفرد ): بتدرس الكيمياء بكل فروعها عضويه وغير عضوية وحراريه وكهربيه وتحليليه وفيزيائية وحيوية وثيرمو والكترو واروماتيك وستريو وبروتين وكربوهيدرات وكوانتم ، ( مجالات العمل ) : فى معامل وشركات التحاليل الطبية ، شركات الادوية والاسمدة ومستحضرات التجميل والسكر والمياة والكهرباء ومصانع الزيوت والدهون والصابون والمنظفات الصناعية والدهانات وصناعة البطاريات والسبائك والحديد والصلب ، بيفضل فى شغل المصانع وفى الكيمياء الشرعية عن اى قسم اخر .

2. ( كيمياء / جيولوجيا ): يدرس نص مواده جيولوجيا ونصها كيمياء وميزته انه يقدر يشتغل بالاتنين الكيمياء والجيولوجيا يعني ماسك العصاية من النص ، ( مجالات العمل ) : نفس شغل قسمي كيمياء وجيولوجيا منفرد.

3. ( كيمياء / فيزياء ) : يدرس نص مقرراته كيمياء ونصها فيزياء ، ( مجالات العمل ): نفس شغل قسمي الكيمياء والفيزياء .

4. ( فيزياء / فلك ) : بيدرس نص المواد فيزياء ونصها فلك ، بندرس فيه النجوم وازاي بتولد ومرورها بعدة مراحل حتى أنفجارها وكيفية تسميتها ، وهانعرف كل حاجة تخص كواكب المجموعة الشمسية من تركيب التربة والغلاف الجوي الخاص بكل كوكب والاقمار التي تدور حول كل كوكب ، وبنعرف انواع كل التلسكوبات وازاي بنستخدمها في الرصد الفلكي بأنواعه ، وبنعرف الاقمار الصناعية وكيفية دورانها في مدارات حول الشئ التي اطلقت من أجله ، هندسة سماوية: بندرس فيها الانظمة المختلفة اللى منها بنعرف مواقع النجوم والكواكب بالنسبة للكرة الأرضية ، وازاي فصول السنة بتحدث وبندرس فيه التقويم وازاي بنحسبه ، ميكانيكا الفضاء: بتدرس انواع المدارات اللي بتدور فيها الاقمار الصناعية وخواصها وازاي القمر الصناعي بيدور فيها و امتى يكون في الفضاء ، الفلك الفيزيائي: بندرس فيها الفلك من الاتجاه الفيزيائي يعني ازاي النجوم بتولد وبتعيش فترة شباب الي ان تنتهي بالانفجار ، وبتدرس حركة الكواكب والمجرات ، ( مجالات العمل ) : نفس شغل قسمي فلك منفرد وفيزياء منفرد اللى قولناها .

5. ( فيزياء / علوم جويه ) : كوبي بيست من اللي فوقيه ، بس الفرق هنا انك بتدرس كل حاجة تخص الأرصاد الجوية بس مش انت اللي بتشتغل فى النشرة الجوية بتاعة الساعة تسعه ديه لا انت اللي بتجبلهم الداتا اللي هما بيقولوها وانت بقى بتدرس طبقات الغلاف الجوي و ازاي الرياح بتتحرك وهكذا ، بجانب انك ليك فرصه انك تشتغل في برج المراقبه في المطار علشان تشوف حالة الجو هاتسمح للطائرات تقلع ولا لأ ، وغيرها.

6. ( فيزياء منفرد ) : قسم عشاق الفيزياء ودراسته فيزياء كهربيه وحراريه وكل انواع الفيزياء والدراسة فالقسم عايزة انك تكون معتمد علي نفسك شوية وانك ما تعتمدش فقط على المنهج الجامعي و تشتغل مع نفسك في البحث الخارجي ، والقسم لازم تتخرج منة على الاقل بتقدير جيد جدا عشان تلاقي شغل محترم معيد في اي جامعة خاصة او شغل في هيئة الطاقة النووية ، وفية شغل في مصانع الاجهزه الكهربيه ومصانع الحديد والفحم بيكون فني بيمسك الالات الكبيرة وبيعملها حسابات زي حسابات الديناميكا الحرارية وهكذا، كفيزيائى طبي ، وشغل اكاديمي اكتر من كونة فني يعني باحثين في مراكز البحوث او في مدينة زويل او اعضاء هيئة تدريس فالجامعات او باحث في الجامعات الخاصة او الاجنبية او سيرن او وكالات الفضاء بتحتاج فزيائين او المفاعلات النووية بس كل دة خارج مصر لازم تدرس ماجيستير ودكتوراه و ايضا لازم تدور علي منحة عشان تدرس ماجيستير ودكتوراه برة لان الفيزياء من العلوم التقيلة اللى محتاجة تدرسها بره وعلي الاقل عشان تاخد منحة للدراسة فالخارج لازم تكون جايب جيد جدا ، ولو الدنيا قفلت فى وشك تعرف تبقي مدرس فيزياء بعد ما تاخد سنة تربوي.

7. ( جيوفيزياء ) : هي تطبيق لقوانين الفيزياء علي الجيولوجيا اللي هي علوم الارض وهو بيدرس الارض من ناحيه الخواص الفزيائيه وهتدرس فى سنة اولى مقدمة عامة للجيوفيزياء ومبادئ أساسية عن Gravity & Magnetic & Electric & Seismic ، والجيوفيزيائى بيشوف الاستجابه الكهربيه او المغناطيسيه للارض باستخدم الموجات زى السزميك والالكترك والجرافيتي والماجنتيك و غيرهم عشان اعرف فين المكان الغريب اللي في استجابه مختلفه عن اللي حوليه وبالتالى اقدر احدد ايه اللى موجود تحت الارض ، وهو ملوش علاقة بالحفر هو فقط بيجمع معلومات ويحللها ويقرأها ويحدد اماكن تواجد البترول او المياة او اى حاجة تحت الارض ، (مجالات العمل) : التنقيب قبل ما احفر عشان اطلع الحاجه سواء فى شركات البترول او المياة او المعادن او الابار او الاثار او اى حاجة تحت الارض، شروطه: اختار جيولوجيا وجيوفيزياء واجيب فيهم جيد والقسم بياخد 20 طالب اللى حطينه رغبه اولى واعلاهم فى التقدير

رابعا: الاقسام الخاصة وهما قسم علوم البترول الجيولوجية وقسم البيوتكنولوجي فقط 
 (ودول موجودين فى جامعه القاهره و الاسكندريه والسويس وحاليا فى طنطا فقط) ، والتخصص فيهم بيكون من سنة اولى ، يعنى مش محتاج تقدير عشان تدخل القسم ، بس هتحتاج تقدير عالى عشان تشتغل ، والقسمين بدون شروط ومفتوح العدد لاى طالب يدفع المقابل المادى له
+ 10% زيادة سنوية و حاصل على مجموع كلية العلوم لاى جامعة مصرية.

8) علوم البترول الجيولوجية: القسم موجود فى كلية العلوم جامعات القاهرة ، عين شمس ، الاسكندرية ، المنيا ، الاسماعيلية ، بورسعيد ، المنوفية ، المنصورة ، اسيوط ، السويس ، الزقازيق ، وطنطا وغيرهم وفى بعض الجامعات القسم *ببلاش* زي السويس والزقازيق وبورسعيد والمنيا ، وفى البعض الاخر بمصاريف زي اسيوط ب 9 الاف ، وفى القاهرة ب 12 الآف جنية + 10% زيادة كل سنة (كان ب 8 من سنتين ولكن زودوا المصاريف بدون اى اضافة خدمة للطالب) ، بتدرس فى سنة اولى مواد جنيرال العادية اللى هى كيمياء وفيزياء ورياضة وجيولوجيا وجيوفيزياء ، بتكون جيوفيزيائى او جيولوجي مش مهندس بترول ، مشكلة القسم ان شغله صعب تلاقيه ولدرجة ان ناس تقولك معكش واسطة متدخلوش ، لانك مش هتلاقى شغل ، فى اسكندرية القسم قوي اوى عن القاهرة لانه بينزلك تدريب فى شركات البترول من سنة تانية وبياخد اعلى ناس فى الانجلش بتاع ثانوي وبيعملك انترفيو وبيكون ليهم مبنى خاص بيهم ومعامل خاصه بيهم، عكس القاهرة بيدخل القسم اى حد هيدفع ومفيهوش اى ميزة من اللى موجوده فى الاسكندرية لا مبنى خاص ولا معامل خاصة ولا اى حاجة سوا المقررات اللى بتدرسها وفقط وفى انك مش محتاج تقدير عشان تدخله وبتدرس مقررات جيولوجيا وجيوفيزيا ودى يعتبره الميزه الوحيده للقسم ، والفرق بينه وبين قسم جيولوجيا وجيوفيزياء فى المقررات اللى بيدرسها كل قسم وهى كالاتى:

علوم البترول: (24) مقرر جيوفيزياء + (21) مقرر جيولوجيا + { (6) مقررات رياضة + (5) مقررات كيمياء + (5) مقررات فيزياء + مقررين انجلش } دول 23 مقرر ملهمش علاقة بتخصصك ولا بمجال شغلك بتدرسهم عشان اللايحة وبس.

جيوفيزيا منفرد: (29) مقرر جيوفيزياء + (8) مقررات جيولوجيا.

جيولوجيا منفرد: اول مقررين جيوفيزياء + (52) مقرر جيولوجيا.

كيميا/جيولوجيا: اول مقررين جيوفيزياء + (28) مقرر جيولوجيا + (22) مقرر كيمياء.

9) بيوتكنولوجي: القسم موجود فى كلية علوم جامعات القاهرة ، حلوان ، المنصورة ، الزقازيق ، بنها ، والسويس ، واسوان وغيرهم وفى كليات زراعة جامعات كتيره زي القاهرة والازهر واسوان وغيرها ، وفى زراعة القاهرة بمصاريف ، وفى بعض الجامعات ببلاش سواء من كلية زراعة او كلية العلوم زى علوم جامعة السويس والزقازيق وبورسعيد وغيرهم ، ولكنه فى بعض الجامعات خاص زى حلوان ب 8 الاف جنية ، والقاهرة ب 12 الف جنيه في السنة + 10% زياده سنويه (كان ب 9 من سنتين ولكن زودوا المصاريف بدون اضافة اى خدمة للطالب) ، والبرنامج متاح لطلبة علمي علوم ورياضه ، هتتعرف علي التعامل اكثر مع العامل الوراثي في النبات والحيوان والانسان وده مدخل مهم لعلاج كثير من الامراض زى السرطان أما بالنسبه للنبات فأهميته إنه ممكن تتدخل لزياده الانتاج وكذلك الحيوان ويدرس التكنولوجيا الحيويه زى ال DNA وتحاليله وكل ما يتعلق بيه سنة أولى: بتتدرس مواد أساسية لعلوم كلها زي رياضة 1 و2 ، فيزيا 1و2 وفيزيكال وأورجانك وكيميا 1 والمتطلبات وبيولوجي بتدرس فيها نبات وحيوان ، سنة تانية: بتدرس كلها كيميات ومادة إسمها genetics و molecular  biology و biostat ، تالتة و رابعة: كله بيكون دراسة جينات ووراثة و DNA ، شغله: نفس شغل اقسام كيمياء حيوي وميكروبيولوجى وكيمياء حيوان اللى قولناها فوق ، وبره مصر بيشتغل فى المستشفيات لعلاج الامراض الوراثية وفي معامل التحاليل وبالذات اللي فيها تقنيات تحاليل DNA ومراكز البحوث المختلفه وشركات الادويه والشركات الصناعيه زي الالبان والمؤكولات وفي المستشفيات لعلاج الامراض الوراثيه واستخدامات تطبيقات البيوتكنولوجي في الصناعه والزراعه وغيرها.
وفى الحقيقة احنا مش بننصح بالاقسام الخاصة :

----------------------( اشكالية الاقسام الخاصة )----------------------

فى البداية برنامج البترول انشا برعاية شركات البترول وكان بيقدم فى خدمات مميزة للطلبة عن الاقسام العادية مثل الاتى:

(1) شركات الراعية بتدرب الطلبة عندها من سنة اولى وكل سنة حتى التخرج.

(2) بتطورلهم فى المناهج بحسب ما تراه مناسبا لسوق العمل.

(3) بتحطلهم كورسات انجلش من المعهد البريطاني.

(4) وجود مبني خاص للقسم ومعامل ومدرجات واجهزة حديثة خاصة للقسم.

وكل ده عشان الطلبة تكون مميزة عن غيرهم ويتخرجوا يكونوا مؤهلين لسوق العمل ويشتغل اغلبهم فى شركات البترول الراعية للقسم حسب العقد

وعلى الاساس ده القسم كان خاص ومميز ، وعلى اساس ده بردو الطلبة كانت بتدفع الفلوس للقسم عشان اول ماتتخرج تكون مؤهله للشغل اكتر من اى قسم وضامنه انها تشتغل فى شركات البترول دى

دلوقتى الوضع مختلف تماما ، كل الشركات الراعية مشيت نظرا لتدني مستوى القسم وكل المميزات دى راحت وتحول القسم من قسم خاص ومميز لقسم خاص فقط ، بقى القسم عادى زيه زي اى قسم تانى ، وفضلت الفلوس اللى بيدفعها الطالب، لا مش بس كدا ، الفلوس دي زادت السنة اللى فاتت كمان من 8 ل 12 الف جنية + 10% زيادة كل سنة ، يعني اكتر من النص من غير خدمة او ميزة واحدة اضافية للطالب الدارس فى القسم عن الداراس فى القسم العادى

فالخلاصة ان قسم بترول مش حلو لانه بفلوس من غير اى ميزه ، لانك بتدرس مواد جيولوجيا وجيوفيزيا وبتشتغل نفس شغل اقسام جيولوجيا وجيوفيزيا وكيميا جيولوجيا فى الاخر ، يبقي ادخل قسم جيولوجيا او جيوفيزيا او كيميا جيولوجيا من الاول ووفر فلوسك!!

- طيب امال ايه لازمة الفلوس دلوقتى؟

مفيش ميزة واحدة بتاخدها ادام الفلوس اللى بتدفعها ، بتدرس مواد عادى جدا زيك زي اي قسم بس كدا

- هتقولى طيب مش بيدربونى فى سنة تالتة حتى ؟

هقولك اى قسم فى الكلية طلابه مينفعش يتخرجوا الا لما يدربوهم ، كل قسم ع حسب مكان التدريب ، يعني اقسام جيوفيزيا وجيولوجيا بيدربوا فى شركات البترول ، واقسام الكيمياء بتتدرب فى شركات الادوية وغيرها ، وده فى لايحة الكلية ، فميهاش ميزة لبترول او بيوتكنولوجى عن اى قسم تانى في الكلية

نفس الكلام لقسم بيوتكنولوجى بيدرس مواد من اقسام كيميا حيوي وميكروبيولوجي وحيوان وفى اختلاف فى بعضها وبيشتغلوا نفس مجالات الشغل فى الاخر!! اللهم الا لو مقرر انك هتشتغل بره مصر فليهم شغل تانى

فتخيل انت هتدفع اكتر من 50 الف جنية فى الكلية عشان فى الاخر تخرج تشتغل نفس شغل خريج قسم مدفعش فى حاجة!! وممكن لو القدر حكم تلاقى معاك فى نفس الشركة وبيشتغل نفس شغلك ساعتها هتتحسر ع الفلوس اللى دفعتها من غير لازمة !!! الا لو انت دافعها عشان حابب العلم وعايز تتعلم العلم ده

ملحوظة: لما تدخل بترول او بيوتكنولوجى هيقال دى اجهزة جايبنها بفلوسك *باقى اقسام الكلية شغالين على اجهزة من فلوس الحكومة وانت الوحيد اللى بتجيب اجهزة بفلوسك* ، فباقى الاقسام بيتجبلها اجهزة للمعامل دي وظيفة الكلية مش وظيفة الطلبة انها تجيب اجهزة للمعامل :D

خلاصة الكلام ده كله ان الاقسام الخاصة مش مميزة عن الاقسام الاخرى لانها بتدرس مواد مشتركة وبعض المقررات المختلفة ، وبعد التخرج بتشتغل نفس شغل الاقسام الاخرى فى النهاية.

--------------------------------( انتهى )----------------------------------

ملحوظه : مش كل الاقسام دى متاحه فى كل الجامعات لكن غالبا اول 5 اقسام بالنسبه لعلمى رياضه متاحه فى معظم جامعات مصر لكن الباقى فى بعض الجامعات بس وكمان فى بعض الجامعات بتتيح لطلبع علمى علوم انهم يتخصصوا فى بعض اقسام علمى الرياضه (زى قسم كيمياء منفرد ).

لو عاوز تعرف أكتر عن موضوع مجالات عمل طلبه وخريجى كليه العلوم ادخل الموضوع ده : الوظائف المتاحه لطلبه وخريجى كليه علوم -علومنجى دوت كوم-

ايه موضوع الساعات المعتمده ده ؟

بص يا سيدى انت دلوقتى مثلا بتاخد مادة الكيمياء ، بتاخد كل اسبوع محاضره وبتاخد سكشن ، المحاضره بتبقى ساعتين والسكشن 3 ساعات فاحنا بنحسب حاجة اسمها الساعات المعتمده للماده كالاتى ان اى محاضره الساعتين بتوعها بيتحسبوا بساعه معتمده ، وان اى معمل او سكشن الساعتين او 3 ساعات بتوعهم بيتحسبوا بساعه واحده معتمده فكده تعالى نحسب الساعات المعتمده بتاعة الكيمياء، محاضره ساعتين = ساعتين معتمدتين ، سكشن تلات ساعات = ساعه واحده معتمده ، يبقى مادة الكيمياء كده ب 3 ساعات معتمده ، لو حسبتها فى الخمس مواد هتلاقى انك بتاخد فى التيرم الاول 18 ساعه معتمده (فى بعض الجامعات بتكون 15 بس)  ، يعنى هى طريقه لتحويل المواد الى ساعات معتمده ، ولو اخدت متطلبات جامعة المتطلب الواحد = ساعتين معتمدتين (لان مفيهاش عملى هما نظرى بس) ، ولما تيجى تطلع تانيه مش هيقولك انت معدى كام ماده عشان تطلع تانيه لا هيقولك انت معدى كام ساعه معتمده بس اهم حاجة تكون نجحت فى 24 ساعة معتمدة من مجموع ساعات الترمين "من غير المتطلبات" عشان تطلع سنة تانية وكمان فى حاجه لو انت شلت ماده فى الترم الاول فى سنه تانيه (اى بعد التشعيب) وكانت الماده دى متطلب لماده فى الترم التانى يعنى هتقفلها (مش هتقدر تدرس الماده بتاعه التيرم التانى دى غير السنه اللى بعدها ) فتقدر تاخد ماده من مواد سنه تالته وده طبعا متاح فى بعض الكليات وليس كلها.

 ما الفرق بين نظام الساعات المعتمدة والنظام القديم؟
 

النظام الجديد بيحاسبك بالساعات المعتمدة + به سمر كورس ، اما النظام القديم فبيجاسبك بالمواد لو نزلت فى مادتين تطلع بيهم السنة اللى بعدها بدون اى مصاريف اضافية ولو نزلت فى ثلاث مواد بتعيد السنة بردو بدون مصاريف اضافية.

ازاى احول من كلية تطبق النظام القديم لكلية تطبق الساعات المعتمدة او العكس؟

فى جامعات مش بتقبل التحويل لمجرد انك نظام قديم ، وفى مش بتقبل لمجرد انك نظام جديد ، وفى بتقبل بس بيعيدوك السنة كلها ، وفى بتقبل ويحذفولك المواد اللى انت اخدتها زى اللى عندهم ويشيلوك المواد اللى مدرستهاش ، فاسئل فى شئون الجامعة اللى هتحول لها لانها هى الجهة الوحيدة المسئولة واللى عندها علم بكل الاجراءات اللى هتم فى حالة التحويل ، مع العلم ان كليات الازهر لا يمكن التحويل منها او إليها ،

------------------------------(ولو عايز تفاصيل اكتر شوف ده: )--------------------------

بالنسبة للتحويلات عشان الطلبة بتاعة الثانوية وهى بتكتب التنسيق وبتختار الكليات متبقاش خايفه

فى نوعين من التحويل:

1- تحويل بعد سنه دراسه فى الجامعه اللى هتقبل فيها (وده المتعارف عليه من زمان الزمان ) وده لسه موجود حتى الان.

2- تحويل الكترونى وده جديده من 2011 تم تطبيقه وده لو جالك اى كلية فى الاقاليم .. بيتفتح الموقع بتاع التحويلات بعد المرحله التالته ما تخلص وتدخل تكتب بياناتك بعد ما جالك كلية بعيده عن موقعك الجغرافى وتكتب رغبة للتحويل فى كلية قريبه وتختارها .. وده بيسموه (تقليل الاغتراب) وده بيبقى بنسبة فى الميه 20 % تقريبا.

طب لو انا مجتش تبع النسبه المئويه دى ومتقبلتش وحظى زفت هعمل ايه ؟!!

هتضطر تحول ورقى .. والتحويل الورقى سنه شغال وسنه لا .. ودى زى الالكترونى بس بيبقى مع الموظف فى الجامعه يعنى بالحب بيحول ولا نسبه ولا بتاع .

طب لو متقبلتش الكترونى وكمان التحويل الورقى لم يتم فتحه السنه ادى وده بيحصل ؟!!

ساعتها هترجع للاكترونى تانى وتحول اى كلية بقا جايبه مجموعك وخلاص وبتتقبل فيها طبعا لانك كنت جايب مجموعها

لان التحويل الالكترونى حاجتين .. الاولى احول لنفس الكلية بس جامعه قريبه منك .. وده بتاع النسبه المئويه والتانيه انك تحول الكترونى بس لكلية مختلفه لجامعه قريبه منك ...وده سهل طبعاَ لان التنسيق بيكون ظهر كل كليه خدت من كام .. فأنت عرفت خلاص انت مجموعك يجيب كلية ايه .. فبتكتب الكليه اللى مجموعك هيجيبها بشرط تكون فى محافظتك فقط لاغير .

يبقى هنعمل ايه بقا عشان توهنا ؟!!

هتكتب الكلية اللى حضرتك عايزها بكل الاقاااليم بتاعتها ......لو جتلك خير وبركه .. لو مجتش وجات محافظه بعيده هتضطر تستنى التحويل الالكترونى لما يفتح فى اول شهر 9 وتطلب تقليل الاغتراب وتستنى الرد بعديها بكام يوم ولو اتقبلت وجيت مع النسبه المئويه يبقى خير وبركه ... طب لو برده متقبلتش ؟!!

هتروح الجامعه تسأل هل فى تحويل ورقى ؟! هيقولك لو فتح .. هتحول ورقى تقليل اغتراب ... طب لو قالك مفتحش .. قوله خلاص عايز ادخل كلية " كذا " فى محافظتك .. ودى انا جايب مجموعها اصلاَ بس وهتدخل بقا اى كلية وخلاص فى محافظتك

-------------------------------(انتهى)------------------------------

ملحوظه: يجب امضاء ورقه المقررات من المرشد الاكاديمى المدرج اسمه فى اعلى جدول المحاضرات الخاص بكل فرقه (والمرشد الاكاديمى هو احد الدكاتره الموجودين فى الكليه).

   

طب وايه نظام الدراسه؟

عندنا كل ماده من 200 درجه متقسمه كالاتى 20 درجات على الميدتيرم (وبيكون بعد حوالى شهر من بداية الدراسة) ، و 40 درجه على العملى (لو وجد عملى)،و 20 درجه شفوى ،و 20 درجه حضور وانشطه و كويزات (اعمال فصليه) ، و 100 درجه على الفاينال وده الامتحان اللى فى اخر الترم خالص وبيكون الاسبوع اللى بعد العملى علطول (لاحظ الفاينل درجته نصف درجه الماده) .

 

طب التقديرات ايه ؟

النجاح من 60  (ما يعرف ب 1 من 5) ،

المقبول من 60 - 64 (ما يعرف ب 1 حتى 1.4 من 5)،

الجيد من 65 - 74 (ما يعرف ب 1.5 حتى 2.4 من 5)،

الجيد جدا من 75 - 84 (ما يعرف ب 2.5 حتى 3.4 من 5) ،

الامتياز من 85 - 100 (ما يعرف ب 3.5 حتى 5 من 5).

 

السمر كورس (الترم الثالث):

هو فصل دراسى للطالب الذى رسب فى مادة او مادتين او ثلاث مواد خلال السنة الدراسية الواحدة ، وذلك بمقابل مادى 300 جنية للمقرر الواحد ابو 3 ساعات اى ما يعادل 900 جنية لثلاث مواد بتسعة ساعات معتمدة يدرس فيها الطالب المقرر(ات) لمدة 5 اسابيع بمعدل محاضرتين وسكشنين فى الاسبوع الواحد للمقرر الواحد ، ويبدأ الفصل الصيفي بعد اسبوعين الى 4 اسابيع من اعلان النتيجة مع العلم ان النتيجة اعلان النتيجه هذه السنة بعد الامتحانات باسبوعين او ثلاث اسابيع على الاكثر ، وتعتبر ادارة الكلية الفصل الصيفي فصلا اختياريا للطالب ، وهو كذلك ولكنه فى الواقع يعتبر اجبارى للطالب الذى يرغب فى التخرج من الكلية فى 4 سنوات فقط وليس اكثر وكذلك للطالب الذى لم ينجح فى مقرر من المتطلبات زى التحليل الالى مثلا لن تدخل تحليل الى 2 سوى عند نجاحك فى تحليل الى 1.

اسعار السمر كورس فى كلية العلوم بجميع جامعات الجمهورية:

سعر الساعة المعتمدة الواحدة فى السمر كورس فى جميع كليات العلوم التى تطبق نظام الساعات المعتمدة على مستوى الجمهورية.

(بدون مصاريف) فى الزقازيق

( 50 جنية ) فى المنصوره ، وشبين *اول سنة تبقى بفلوس*.

( 75 جنية ) فى المنيا ودمنهور.

( 100 جنية ) : بني سويف ، كفر الشيخ ، اسكندرية ، بورسعيد ، اسيوط ، طنطا ، بنها ، اسيوط و400 جنية لقسم بترول اسيوط.

( 150 جنية ) فى قناة السويس ، وعين شمس بنات.

( 200 جنية ) فى القاهرة.

ملحوظه: لا يجوز الغياب اكثر من 25% تعني بالتقريب 3 محاضرات.

ملحوظه : هل مقرري حقوق الإنسان واللغه العربيه والكمبيوتر والبيئه واللغة الانجليزية سيطرح في الفصل الصيفي؟

مقررات متطلبات الجامعة كلها من خارج الكلية وطرح هذه المقررات متوقف علي انتداب أستاذ للمقرر في الفصل الصيفي ولذلك غالبا مش بتبقى موجوده فى الفصل الصيفى لكن تقدر تأخدها بجانب موادك الدراسيه عادى لانها مش بساعات معتمده .

ملحوظه: كيف يتم حساب المقررات التي تم الرسوب فيها أكثر من مره في المعدل التراكمي ؟

يتم حساب مرات الرسوب في المقرر بمره واحده رسوب ومره واحده نجاح وبالتالي ساعات هذا المقرر تصبح في مقام المعدل التراكمي ضعف عدد الساعات الخاصه بالمقرر (اى لو المقرر كيمياء ب 3 ساعات نقسم فى المقام على 6 ساعات وليس 3 فقط وكذلك فى حساب التقدير نقسم على 21 فى كل ترم وليس 18 فقط) .

ملحوظه: هناك تعارض بين الفصل الصيفي والتدريب (لسه هنتكلم عنه تحت) الذي يتبع الكلية فى سنه تالته  ، ما هو الحل؟ اختيار احدهما وغالبا هتجبر تاخد التدريب لانه اجبارى لمن اجتاز 72 ساعة من متطلبات الكلية بينما الفصل الصيفي اختياري وليس إجباري .

ملحوظه:  هل نتيجة التدريب تضاف في المعدل التراكمي ؟

لا يتم أضافه نتيجة التدريب في المعدل التراكمي .

اعمل ايه عشان منزلش سمر كورس واضطر ادفع فلوس اد كدا او انى اتخرج متاخر؟

بص هقولك انت قدامك 3 اختيارات:

1) انك تذاكر اول باول فتنجح صافى وبتقدير كمان.

2) متذاكرش اول باول فتنزل فى مادة او اكتر وساعتها هتضطر تنزل سمر.

3) متذاكرش اول باول فتنزل فى مادة او اكتر وتختار انك متنزلش سمر وساعتها هتتاخر فى التخرج عن اربع سنوات.

ليه بقى؟ لان المادة اللى انت نزلتها دى  هتاخدها فى سنة تانية وده هيخليك تأجل مواد من تانيه لتالته ومن تالته لرابعه وهكذا لحد ما تلاقى نفسك خدت سنه زياده لان كل الساعات اللى عندك مليانه يا اما تاخد بدالها مادة من مواد سنة تانية وساعتها بردو هتضطر تاخد المادة دى فى السمر كورس بتاع سنة تانية او تاجلها هى كمان لسنة تالتة وهكذا.

اجابات لبعض الاسئلة الشائعة:

1) مفيش حاجة اسمها تخلص كلية علوم وتكمل بعدها طب او صيدلة او هندسة او تاخد دبلومة الفارما بتاعة الصيادلة ، بس فى دبلومه الميكروبيولوجي ، ودبلومه الكيمياء الحيويه ودبلومه التحاليل الطبية ، لكن ممكن تكمل صيدلة بس تكمل جامعة خاصة فى بعض الجامعات الخاصة بتيح ده مش كلها ويحذفولك المواد المشتركة اللى انت اخدتها (وطبعا بعد حزف المواد المشتركه هتضطر تأخد سنتين بدل خمس سنين طبعا فى جامعه خاصه بشرط تكون قسم كيمياء نبات او كيمياء ميكروبيولوجى مع العلم انه متاح لكل اقسام الكيمياء يعملوا كده لكن فترة الدراسه هتزيد عن سنتين وده بيعرف بالـ Double maior أو اكثر من بكالوريوس "يعنى علوم وصيدله" ) ، طيب وعلى ايه ما تدخل جامعة خاصة من الاول لو انت مش حابب علوم .

2) اى قسم  فيه ناس متخرجة ومش لاقيه شغل وفيه ناس اتخرجت واشتغلت على طول ، فلازم تبقى عارف ان موضوع الشغل ده رزق والرزق بتاع ربنا فمتشغلش بالك غير بحاجة واحدة وهى اجتهادك فى دراستك وتدريبك.

3) اى قسم كيمياء سواء منفرد او مزدوج تعرف تشتغل منه شغل الكيمياء و85% من شغل الكيمياء فى مصر بيكون فى معامل التحاليل بمرتب 800 - 3000 جنية كحد اقصى وحلو للبنات ، وميديكال ريب "مندوب ادوية طبية"بمرتب 1200 - 4000 جنية كحد اقصى ومش حلو للبنات، ومتاح طبعا الشغل فى المصانع والشركات ، وعلى حسب المصنع او الشركة دى كويسه ولا متواضعه بس هتلاقى من 1000 - 6000 جنية (وغالبا بتحتاج واسطه) ، علوم حاسب بتبدا بمرتب 1000 جنية وبيوصل ل11 الف انت وتطويرك لنفسك واجتهادك فى الكورسات ،وكل الارقام دى مش من تاليفي ولكن من خريجين شغالين فى المجالات دى بقالهم سنين وفى الجوده على الرغم من فلوسها الكتير ولكن لاسباب الاتيه لا يعمل بها الكثيرين من خريجى كليه العلوم .... الجوده يعمل بها خريجى الجامعه العماليه بتخصص يسمى جوده وخريجى هندسه و خريجى علوم وتنقسم الجوده الى جوده معمل (وهى تابعه فى الغالب الى مدير المصنع) وجوده انتاج (وهى تابعه للانتاج يعنى واحده سلطه) والتانيه فلوس اكتر المرتبات فى الشركات المحترمه تبدا من 1200 الى 2500 جنيه والبترول :وده انا سمعت عنه كلام كتير اوى اول حاجه شركات خدمات بتروليه ودى مرتبها زى ماسمعت حوالى 1500 الى 2000 ووحشه لكن شركات البترول ودى لن اتحث عن مراتبتها عشان الحسد 3000 دولار وطالع ودى بتشتغل فى المعمل او بتحضر mud وهى المواد المسئوله عن زوبان التربه الخ الخ فى موضوع الشغل هيبقى فى موضوع كامل ليه.

4) مجالات عمل خريجى علوم:

  http://3lomangy.blogspot.com/2016/07/science-work.html

5) كل ما يخص شغل التحاليل الطبية:

 http://3lomangy.blogspot.com/2016/07/how-to-be-good-medical-specialist.html

http://3lomangy.blogspot.com/2016/07/medical-laboratory.html

6) اى قسم ممكن تشتغل منه مدرس ولازم تاخد سنة تربية  بتدرس 16 مادة 8 مواد ترم اول و8 ترم تانى وكل المواد تربوي وملهاش شروط.

7) خبر سئ بس لازم تبقى عارفه وهو الغاء تعيين اوائل الجامعات بداية من دفعة 2014

 8) اكتر حاجة اجمع عليها الخريجين انها غلطة كبيرة عملوها هى انهم منزلوش تدريب ومخدوش كورسات من وهما بيدرسوا فى الكلية فلازم بجانب الدراسة تحضر مؤتمرات وتاخد كورسات ودورات بس خلى بالك عشان فى دورات كتير بتكون نصب وهدفها الربح فقط.

9) الفرق بين النظام الجديد نظام الساعات المعتمدة المتطبق فى القاهرة والاسكندرية وغيرها وبين النظام القديم المتطبق فى جامعة حلوان وعين شمس وغيرها هى ان النظام الجديد بيحاسبك بالساعات المعتمدة زى ما اتكلمنا فوق وبه سمر كورس زى ما اتكلمنا عن تفاصيله فوق بردو ، اما النظام القديم فبيجاسبك بالمواد لو نزلت فى مادتين تطلع بيهم السنة اللى بعدها بدون اى تكاليف اضافية ولو نزلت فى ثلاث مواد بتعيد السنة.

10) شروط الاقسام ممكن تتغير من جامعة لجامعة ومن سنه لسنه مثال: قسم كيمياء منفرد خد السنة اللى فاتت من تقدير عام جيد جدا والسنة اللى قبلها من تقدير عام جيد ، بتختلف على حسب اقبال الطلبة على القسم من سنة للتانية.

11) بالنسبة للتحويل سواء من جامعة تطبق نظام الساعات المعتمدة للنظام القديم او العكس او لنفس النظام ، فى جامعات مش بتقبل التحويل لمجرد انك نظام قديم ، وفى بتقبل بس بيعيدوك السنة كلها ، وفى بتقبل ويحذفولك المواد اللى انت خدتها زى اللى عندهم ويشيلوك المواد اللى مختهاش ، فاسئل فى شئون الجامعة اللى هتحول لها لانها هى الجهة الوحيدة المسئولة واللى عندها علم بكل الاجراءات  فى حالة التحويل

12) الدبلومات المتاحة لجميع اقسام علوم:

 http://3lomangy.blogspot.com/2016/07/Diploma-Analytical-Biochemistry.html

http://3lomangy.blogspot.com/2016/07/Diploma-microbiology.html

التقديم للطلبة الحاصلين ع تقدير تراكمى جيد على الاقل وفى بعض الجامعات بتشترط جيد جدا ، التقديم فى أغلب الجامعات بينتهي 30 أغسطس والأوراق بتكون: 4 صور شخصيه + بيان درجات الأربع سنين وفي جامعات بتاخد صوره المؤهل + صوره بطاقه + صوره شهادة الميلاد.

13) اهم مواد الفرقه الاولى :

 مواد الفرقه الاولى طبيعه

 

مواد الفرقه الاولى بيولوجى

 

مواد الفرقه الاولى جيولوجى

14) فى امتحانات اسمها midterm ودى بتكون بعد اول شهر او اسبوعين وبعدين قبل النظرى باسبوع او اسبوعين العملى وبعدين النظرى مادتين الى ثلاث مواد فى الاسبوع اصعب سنه فى ناس بتقول اولى وناس بتقول 3 أو 4 بس الكل أجمع ان 2 أسهل سنه.

15) ما هي أقصي مده يمكن للطالب تقديم تظلم لإعاده الرصد ؟

  أقصي مده يمكن للطالب تقديم تظلم لإعاده الرصد هي أسبوعين من ظهور نتيجه المقرر علي صفحه الكليه

16) ماذا تفعل الكلية فى رصد درجاتى هل يعيدون تصحيح الورقة ؟

  اعادة رصد الدرجات لا تعنى اعادة تصحيح الورقة ولكن يتم مراجعة الورقة فاذا هناك سؤال لم يتم تصحيحه تعاد الورقة الى استاذ المقرر ليصححه واذا هناك درجات لم يتم جمعها تجمع.

17) تماشيا مع كل دول العالم التى بها خريجى كليه العلوم هم رقم واحد في التحاليل الطبيه قامت الجامعه الامريكه بالقاهرة بفتح دبلومه دوليه لخريجى كليات العلوم دبلومه من الجامعه الامريكه وفى الاخر بتاخد تصريح من منظمه الكلينكال باثولجى الامريكيه انك اخصائى تحاليل معتمد وتصبح  clinical lab scientist دولي وممكن تشتغل بيه في اي دوله اوربيه ((رئيس هذا البرنامج هو الدكتور حسن عزيزى وهو دكتور تحاليل طبيه خريج كليه العلوم قسم الكميا الحيويه بجامعه الاسكندريه و دكتور في الجامعه الامريكه في القاهرة وعمل دكتورا في بعض جامعات الامريكه في تخصصات التحاليل الطبيه وهو محاضر دولي في التحاليل الطبيه))

 18) فى حاجه اسمها التدريب الصيفى بيبقى فى أجازه السنه الثالثه وفى حاجه اسمها مشروع التخرج بتبقى فى السنه الرابعه :

 

ملحوظه: هناك تعارض بين الفصل الصيفي والتدريب الذي يتبع الكلية فى سنه تالته  ، ما هو الحل؟ اختيار احدهما وغالبا هتجبر تاخد التدريب لانه اجبارى لمن اجتاز 72 ساعة من متطلبات الكلية بينما الفصل الصيفي اختياري وليس إجباري .

ملحوظه:  هل نتيجة التدريب تضاف في المعدل التراكمي ؟

لا يتم أضافه نتيجة التدريب في المعدل التراكمي .

 19) تسجيل المواد والارشاد الاكاديمى :

20) كيفيه تأجيل ماده - كيفيه التحويل من القسم بعد مرور عام او اكثر من وجودك فيه :

 

 21) ما السبب اللى ممكن يؤدى لايقاف قيدك او فصلك من الكليه :

 

22) فى نظام اسمه نظام الاستماع (وهو دراسه مقرر فى جامعه اخرى يعنى تبقى فى علوم طنطا مثلا وممكن تدرس ماده من علوم الاسكندريه او من هندسه مثلا):

23) ما هى متطلبات التخرج ؟؟

ملحوظة: فى 5 مقررات اسمها متطلبات جامعة (انجلش + حقوق انسان + كمبيوتر + ثقافة بيئية + لغه عربيه ) ودى مواد على الرغم من انها تعتبر سهله جدا لكن مجرد رسوبك فى احد هذه المواد بتفقد مرتبه الشرف فى شهاده التخرج .