دليلك لسكن خارجى "التنسيق وداك جامعه فى مكان بعيد عن محافظتك" -علومنجى دوت كوم-

في الموضوع ده هنعرض عليكم تجارب اللي درسوا في محافظات تانية ، وهتعرفي نصايح تخليكم تعدوا فترتك الجامعية بدون قلق فلو لسة مخلصيين ثانوية عامة والتنسيق هيخليكم تكملوا دراستكم في محافظة غير محافظتكم ، متقلقوش ، وافتكروا إن فيه ملايين الطلاب المغتربين بعضهم سافر برة مصر خالص عشان يكمل دراسته ، مش بس برة محافظاتهم

المدينة الجامعية

المدينة الجامعية أحسن اختيار للمغتربات الجدد ، لأن فيه حد تاني مسؤول عن تأمين المكان اللي ساكنين فيه وكمان عن تقديم الوجبات ، وده ميزة كبيرة ، خاصة في أول قرار سفرك لأنكم حتكونوا مشغولين بحاجات تانية ، مع العلم إن إيجار الشهر في المدينة الجامعية ما بيزيدش عن 200 جنيه بالوجبات "فى معظم المدن وحاليا 165 جنيه" وده معناه توفير كبير لمصاريفك.

يقول أحمد عبد الونيس «أنا من الغربية ودرست في جامعة القاهرة وقضيت 4 سنين الدراسة في المدينة الجامعية وكان ليها مميزات زي ما كان ليها عيوب ، مميزاتها هي الأجرة البسيطة وكمان الـ3 وجبات المتوفرة  لكن كنا بنلاقي أزمة أيام الامتحانات عشان نركز لأن المدينة زحمة وكل دور فيه 50 أوضة وكل أوضة فيها شخصيين فكان صعب الواحد يركز في المذاكرة ».

وده كان نفس رأي ياسمين يونس «أنا من المنوفية واضطريت أدرس في جامعة أسيوط وأول ما عيشت في المدينة الجامعية كنت كارهاها لأن أوضها ضيقة والعفش اللي فيها قديم لكن بمرور الوقت اتعودت عليها واتفقت مع زميلتي في الأوضة إننا نجملها على طريقتنا بالملايات والستاير وكمان جيبنا مفارش لحد ما بقت حاجة تانية خالص وكمان لما بتقدري تكوني صداقات مع زمايلك من الكلية أو من زمايلك في الأوض التانية بتلاقي إن الوقت اللي بتقضيه في المدينة هو أحلى وقت».

سكن خارجي

فيه ناس كتير بتفضل إنها تقعد في بيت خاص للطالبات أو تأجر شقة مع ناس من زمايلها على اعتبار إن الحل ده بيحافظ على الخصوصية أكتر وبيدي فرصة أكبر في التأخير بعكس المدينة الجامعية اللي لازم تقفل أبوابها 8 بالليل للطالبات و11 للطلبه.

وعن التجربة دي بيقول محمد توفيق «أنا إسكندراني وكنت بدرس في جامعة القاهرة وكنت مقررة من أول يوم ماسكنش في المدينة الحكومية عشان مستوى النظافة ، وفي الأول قعدت في سكن للطلاب وكان إيجاره 800 جنيه في الشهر وكان ليا أوضة لوحدي ودي كانت أهم حاجة بالنسبالي ، بس الإيجار ده من غير الأكل ، كان بيقى فيه بوتاجاز وتلاجة للي عايز يطبخ ، بس أنا عن نفسي كنت بكسل وأشتري أكل جاهز ، ولما اتخرجت روحت عيشت في شقة مع 2 زمايلي ، ولقيت إن الوضع مختلفش كتير».

وأضافت شيماء محمد من المنيا «أنا جربت أعيش في المدينة الجامعية وقت الدراسة في جامعة القاهرة وبعدها أجرت شقة مع 5 من زمايلي برة ، وكل حالة فيهم كان ليها مميزاتها ، فمميزات المدينة الجامعية هي توافر إقامة بأكل بسعر بسيط وكمان مسؤوليتنا فيها كنت قليلة ولو حصل أي عطل في الكهرباء أو المية فيه عمال بييجوا يصلحوه واحنا مش مطلوب مننا حاجة غير الحفاظ على نظاقة أوضنا وبس ، إنما لما عيشنا في شقة لوحدنا كان فيه مزايا تاني زي الخصوصية ، ووجود تليفزيون ونت احنا اللي مدخلينهم ، مع حرية الكل في أي ميعاد والرجوع للبيت في أي ميعاد ، حياة تعتبر مسؤولة أكتر».

وتقول ميرنا رؤوف «مش صعب إن البنت تعيش في شقة خاصة طالما معاها زمايلها ومش حيلاقوا مضايقات من الجيران ولا حاجة زي ما الدراما بتصور ، طالما مش بيعملوا حاجة غلط ، إنما أهم نقطة في الخطوة دي هي اختيار زميلات السكن واللي لازم يكونوا بيتحملوا المسؤولية ، لأن العيش في شقة معناه توزيع مهام بالعدل بين التنضيف وبين الطبيخ ، ولو اللي معاكي مش بيتحملوا مسؤولية أو كسلانين حتتحول شقتكم لكابوس من الخلافات».

ودي مجموعة نصايح حطوها حلقة في ودنكم لو ناويين تقعدوا في المدينة الجامعية:

1.   لو تقدروا تضموا مواعيد محاضراتكم في أيام قليلة بحيث تكونوا نص الأسبوع في الجامعة والنص التاني تروحوا بيتكم يبقى أحسن.

2.   ما تحاولوش تلعبوا في مواعيد المدينة سواء في الرجوع أو في تناول الوجبات لأن دة قانون من سنين لكن لو أقلمتوا نفسكم عليه حترتاحوا أكتر.

3.   الصحبة هي أهم عامل يخليكوا تعدوا أيام الاغتراب وانتوا مرتاحين ومتسليين ، وممكن كمان تكونوا مبسوطين أكتر ما تبقى قاعدين لوحدكم في البيت لأن اللمة ليها حلاوتها برضه ، فالمهم تختاروا أصدقائكم كويس.

4.   لازم تعرف إن أوضتك في المدينة مش ملكك لوحدك ، وأحسن حل إنك تحط نظام وترتيب مواعيد النوم والمذاكرة بالتنسيق مع زميلك فيها عشان أنتم الاتنين تريحوا بعض.

ولو حتعيش في سكن خارجى "شقه خاصه" او هتعيشى فى بيت طالبات:

1.   حاولوا تختاروا شقة مناسبة قرب موقع الجامعة بقدر الإمكان.

2.   لازم تكونوا من النوع اللي يقدر يتحمل مسؤولية بيت ويدبر مصاريفه كاملة.

3.   لازم تتعاونوا مع زميلكم في مهام الأكل والتنضيف وتكونوا واثقين إن هم كمان قد المسؤولية.

4.   لازم تأكدوا على صاحب الشقة إن الشهر التأمين اللي دفعتوه حتأخدوه تاني وأنتم ماشيين في الآخر لأن أغلبهم مش بيرضى يرده بالمخالفة للقانون.

5.   ما تكتفيش بالتعامل مع البواب أو صاحب العمارة وتقولي الجيران مش مهمين ، خلي ليكم تواصل مع جار على الأقل تتأكدوا منهم من مصاريف الصيانة اللي بتدفع شهريا للبواب عشان الأسانسير أو المواتير ، لأن البواب ممكن يستغلكم.

6.   ما تعتمدوش على الأكل من برة على طول واستغلي الفرصة إنك تتعلم من زمايلك شغل الطبيخ (أو تقسموها مهام يعنى واحد يطبخ وواحد يغسل وهكذا) ، عشان ما تلاقيش روحك آخر الشهر دافعة مبالغ كبيرة على الفاضي.

المواصلات:

1.   طالما حفظت الطريق من محطة القطر أو الموقف لمكان الجامعة ولمكان السكن ، فأنت كدة مش معرض لأنك تتوه خلاص ولا تتعب في مشاويرك.

2.   ما تتكسفش تسأل أكتر من شخص على العنوان اللي رايحه عشان تتأكد منه.

3.   قبل ما تركب أي مواصلة جديدة اتأكد من حد من أهل البلد الأول من المواصلة ومن الطريق.