أولا هنبدأ الحاجات العامة اللى تهم كل الناس اللى شغالين فى كل المجالات فى المصانع المختلفة ثم هنبدأ نتدرج شوية شوية لحد ما نوصل للكورسات لبعض التخصصية اللى تهم كتير مننا بردو و هحاول على قد ما اقدر اشرح فى كل حلقة بمثال عملى موجود و الناس شغالين به علشان نقرب الكلام النظرى أكتر.
بسم الله الرحمن الرحيم
الحلقة الثامنة
الحلقة الثامنة من حلقات مصنع مصر و هنتكلم فيها عن حاجة اسمها نظام ال HACCP و الحلقة دى مهمة جداااااااا لأهل الجودة زيها زى ال ISO 9001 بالظبط فركزوا فيها يا شباب .
يعنى اية HACCP :- يعنى تحليل المخاطر و نقاط التحكم الحرجة Hazard Analysis And Critical Control Points
النظام دة يا شباب اخترعوه علشان يراقبوا بيه الصناعة من أول المادة الخام لحد ما تخرج منتج نهائي للحفاظ على جودة المنتج بتاعى و بيستخدم فى الصناعات الغذائية لحماية المنتج من التلوث و حماية المستهلك من المخاطر عموما الناتجة عن هذا التلوث ... النظام دة بيخلي الشركة تعمل رقابة ذاتية على نفسها بحيث متستناش مفتشين من الجهات الرقابية أو من الإدارة العامة أو لو كانت شركة انترناشونال يجيلها مفتش من الشركة الأم … طيب دلوقتى أقدر أطبق النظام دة عندى ازاى فى المصنع ؟؟
عن طرق اتباع شوية قواعد كالآتى :-
1. Hazard Analysis:- يعنى تحليل نوعية المخاطر اللى عندى اللى بتأثر فى المتتج من أول المادة الخام اللى بيتصنع منها لحد المنتج نفسه طيب دى هعملها ازاى دي ؟؟ بإنى أمسك كل خطوة من خطوات الإنتاج بتاعتى من أول استلام المواد الخام لحد المنتج النهائي و أشوف تأثيرها على المتتج بتاعى و على الخطوات الصناعية على خط الانتاج و هنضرب مثال على كدة فى معالجة المياة بنستخدم الكلور كمادة معقمة و بيجي لنا فى هيئتين إما كالسيوم هيبوكلورايت Ca (OCl)2 و دى مادة صلبة أو بيجي على هيئة صوديوم هيبوكلورايت NaOCl و دى مادة سائلة و الكلور زى ما انتوا عارفين من اخطر المواد على صحة الانسان و حتى على اى منتج غذائي عموما لأنه عامل مؤكسد قوى جدا و سام فى نفس الوقت عند الجرعات العالية منه و ممكن يبوظ لى المحطات عندى لو كانت ROبيبوظ الأغشية بتاعتها لو فاكرين من الحلقة التالتة ... و هكذا أعمل التقييم دة على كل مادة أو خطوة فى الصناعة.
2. Control Points & Critical Control Points ... CP & CCP :- يعنى نقاط المراقبة و نقاط المراقبة الحرجة ... يعنى اية بردو ؟؟ يعنى بعد ما حددت المخاطر اللى ممكن تواجهنى أبدأ احدد هل هى CP ولا CCP و هنضرب مثال لكل واحدة فيهم ... بالنسبة لل CP دى نقطة مراقبة لعملية معينة من عمليات الانتاج مش بتشكل عندى خطورة شديدة على المنتج أو المستهلك و يمكن تداركها بسهولة و تفاديها بسهولة زى اية مثلا زى ال pH كدة فى صناعة معالجة المياة بيبقى من النادر انها تخرج خارج المواصفات بتاعتى لو أنا عامل كنترول كويس على شغلى و محطتى و مش بتبقى ذات خطورة شديدة لو زادت أو نقصت بمعدل مقعول يمكننى إنى ألحقه بسرعة و أعدله لكن مش بمعدلات خيالية فدى بنسميها CP ... أما ال CCP فدى بتبقى نقطة مراقبة لعملية معينة من عمليات الإنتاج بتشكل خطورة على المنتج و خطورة على المستهلك لو زادت و خرجت برة المواصفات بتاعتى زى اية ؟؟ زى الكلور اللى بضيفه كمادة معقمة للمياة الخام اللى قلنا عليه فوق دة على طول بيبقى CCP لأنه زى ما قلنا سام لو اختلط بالمنتج و ممكن يبوظ لى المحطات بتاعتى و يدمرها بمعنى الكلمة لو كانت أغشية RO علشان كدة بيحتاج مراقبة دقيقة و لازم آخد له احتياطات تمنع وصوله للمنتج النهائي خالص أو تبقى موجودة فيه بحيث متأثرش أبدا على صحة المستهلك زى مثلا بحط قدامه فلاتر من الكربون المنشط يعمل له امتزاز Adsorptionو بالتالى اتخلص منه خالص و الفلتر فى الحالة دى بيبقى هو ال CCP بتاعتى اللى لازم أراقب المية اللى خارجة منها بإستمرار .
السؤال المهم جدا بقى ازاى أنا بحدد اذا كانت الخطوة اللى قدامى دى خطوة CP ولا CCP ؟؟؟ عن طريق شجرة اتخاذ القرار و دى شجرة من 6 أسئلة عامة بسألهم لنفسي بالتتابع كدة و من اجابتهم بوصل لتحديد نوع النقطة اللى قدامى هل هى CP or CCP .
و ال 6 أسئلة دول موجودين فى الخريطة التالية :-
3. Critical Limits :- بعد ما حددت انواع النقاط اللى عندى على طول خط الإنتاج ببدأ احط لها حدود مراقبة أو بمعنى آخر مواصفات طبقا للمواصفات المحلية و الدولية للصناعة اللى أنا شغال عليها و ممكن أغير و احط مواصفات أكثر صرامة لنفسي بس متخرجش أبدا عن مواصفاتى المحلية و الدولية للصناعة دى و فايدة المواصفات دى فى انى أقدر بيها اراقب النقاط اللى عندى دى مراقبة دقيقة و اسجل بيانات بكدة علشان اضمن عملية انتاج مستقرة للمنتج بتاعى خالية من اى مخاطر.
4. Corrective Actions :- و دى خطوة مهمة جدااااااااااااااااااا يا شباب و تعنى الإجراءات التصحيحية فى حالة لو المنتج بتاعى خرج برة المواصفات اللى أنا حاططها يعنى مثلا فى حالة الكلور دة لو خرج برة المواصفات اللى أنا حاططها و مثلا فلتر الكربون تشبع بالكلور و مبقاش قادر يمتص كلور زيادة فخرج كلور فى المية اللى خارجة من فلتر الكربون دة لمدة كبيرة ساعة مثلا يكون الراجل المسئول عن المحطة شغل مضخة الحقن على آخرها و نسيها أو حصلت أى حاجة عملت Over Dosing للكلور فى المحطة لالالالالالالالازم يبقى عندى للحالات اللى زى دى خطة مسبقة Corrective Action Plan بالخطوات اللى أنا لازم أعملها علشان أواجة حاجة زى كدة لأن دى كااااااااارثة بكل المقاييس و اللى حصلت معاه فى ورديته هيتحاكم محاكمة عادلة و يُعدَم ... و للتوضيح أولا لازم أجرى أوقف المحطة اللى حصلت فيها المشكلة دى ، ثانيا أجرى على خط الإنتاج أقول للمشرف على الخط يوقف انتاج ، ثالثا أبلغ المدير بتاعى بالكارثة اللى أنا عملتها و حاول تسد ودنك و تحمى وشك ، رابعا أتخذ الخطوة التصحيحية للى حصل دة و هي إعادة تنشيط الفحم الموجود داخل الفلتر باستخدام بخار مية لو المصنع فيه قسم غلايات أمرر عليه البخار و بعدين اسيبه يبرد و بعدين أعمله عسيل عكسي Back Washing , و بكدة يرجع زى الأول تانى.
5. Verification :- يعنى التثبت و التأكد من كل الخطوات السابقة انها بتمشي صح و مفيش فيها لخبطة و دة عن طريق كذا حاجة ... بالنسبة لخط الإنتاج أحاول اخلى الماكينات اللى عندى صالحة على أفضل حال للإنتاج من متهالكة ولا بتمشي بالعافية و اتابع حالتها باستمرار و دى مسئولية الادارة الهندسية فى المصنع من خلال برامج الصيانة الوقائية Preventive Maintenance و العمرات ، و بالنسبة للمعمل و شغلنا احنا بيبقى عن طريق متابعة النقاط اللى قلنا عليها دى و تسجيل النتائج اللى بتطلعلى بأمانة مش نتائج مضروبة لأنه زي ما قلنا قبل كدة فى نظام الأيزو هيتبنى عليها قرار و هنا بتأكد بيها من سير لعملية بتاعتى بدون مشاكل و أستعين على كدة بالتأكد من تواريخ صلاحية الكيماويات اللى بستخدمها فى التحاليل المختلفة حسب الصناعة اللى أنا فيها و كمان بستعين على كدة من خلال معايرة الأجهزة اللى عندى زى على سبيل المثال جهاز قياس ال pH مثلا و ال TDS Total Dissolved Solid أو جهاز قياس العكارة و الحضانات Incubators فى معامل الميكروبايولوجي و أى جهاز بيحتاج معايرة أهتم بمعايرتها الدورية على طول اذا كانت شهريا ولا ربع سنوية ولا نصف سنوية و غالبا كل ما زادت المدة بيبقى المعايرة خارجية يعنى خارج الشركة فى شركات معايرة متخصصة و كل دة علشان اضمن النتائج اللى طالعة لى.
6. Documentation :- و دى آخر خطوة معانا فى ال HACCP و هى توثيق الكلام اللى فوق دة كله و الخطوات دى فى خطة بيسموها ال HACCP Plan و الناس بتوع ال FDA اللى هى منظمة الأغذية و الأدوية بيقولوا ( الشيء الغير مسجل كتابيا فهو لم يحدث على الإطلاق ) فلازم أهتم بالخطة دى بالتفصيل الممل فبيتم وضع نوع الخطوة الى عندى و مكانها على خط الإنتاج من أول المواد الخام مرورا بخطوات التصنيع لحد المنتج النهائي و توصيف للخطوة و نوعية الخطر المحتمل اللى ممكن يواجهنى منها و بتوع ال FDA بردو بيقولوا ( لو نسيت خطوة إذا أنت نسيت خطراً ) ثم طريقة مراقبتها و الشخص المسئول عن مراقبتها كل دة بحطه فى جدول كبيييييييييير كدة أى جودجى ناصح لازم أول ما يحس أنه ملأ يده من الشغل و اتعلم و بقى يمسك وردية لوحده لازم يسأل على ال HACCP Plan و لو مكانتش موجودة يحاول هو يتطوع و يعملها زى ما قلنا فوق كدة بنية صافية لزمايله و يحتسبها لوجه الله .
عوامل مساعدة على تنفيذ و نجاح ال HACCP Plan :-
1- وجود التزام من الإدارة العليا فى المصنع بتطبيق نظام ال HACCP
2- تحديد مجموعة ذات تأهيل مناسب للعمل كفريق متخصص لل HACCP
3- تحديد مسئوليات الفريق بالظبط من متابعة و تنفيذ و تطوير خطة ال HACCP
4- التنسيق المستمر بينهم و يفضل يكون واحد من كل إدارة فى المصنع
5- روح التعاون بين الفريق و توفير المعلومات و البيانات المطلوبة لهم
6- عمل خريطة للعملية التصنيعية بخطواتها كلها بالتفصيل الممل بيسموها Process flow chart علشان نقدر نحدد منها العمليات اللى فيها CP و CCP
7- وجود رؤية تطوير لدى فريق ال HACCP بحيث يقدروا يكتشفوا الخطر فى كل خطوة و يتوقعوه و يضيفوه للخطة بإستمرار علشان يبقى المنتج و المستهلك بتاعى فى ال Safe Side على طول .
آية الحلقة :- { اللَّهُ الَّذِي رَفَعَ السَّمَاوَاتِ بِغَيْرِ عَمَدٍ تَرَوْنَهَا ۖ ثُمَّ اسْتَوَىٰ عَلَى الْعَرْشِ ۖ وَسَخَّرَ الشَّمْسَ وَالْقَمَرَ ۖ كُلٌّ يَجْرِي لِأَجَلٍ مُّسَمًّى ۚ يُدَبِّرُ الْأَمْرَ يُفَصِّلُ الْآيَاتِ لَعَلَّكُم بِلِقَاءِ رَبِّكُمْ تُوقِنُونَ (2)} سورة الرعد
يُعتبرُ علمُ الكيمياء واحداً من العلومِ الطبيعيّة التي استعملَها الإنسانُ وبحثَ فيها منذُ القدم، وقد كان لهذا العلم في القديم دورٌ كبيرٌ جداً في العديدِ من المجالات التي كانت تَمَسُّ حياةَ الإنسانِ بشكلٍ مباشرٍ وحيويٍّ، وفي يومنا هذا لا زالَ لعلم الكيمياء أهميّته العظيمة في التّقدّمِ الحضاريِّ للدّولِ المختلفةِ
ليست هناك تعليقات:
إرسال تعليق