تكمله لسلسله "تجروبتى مع كليه العلوم" هحكى ليكم النهارده عن تجربه جديده لزميله لينا خلصت الكليه قسم كيميا / حيوان ... اتمنى تستفيدوا.
فلاش باك 4 سنين كدة ايام ما كان حلمي كلية طب .. مكنتش اعرف يعني ايه كلية علوم اصلا .. ذكرتها مرة واحدة بس في حياتي لما قولت " يالهوي لو دخلت علوم (-_-)" وفجأة طردت الفكرة واستعذت من الشيطان وكأن ربنا كان مستتني اني اقولها عشان يستجاب للكلمة دي وكأن ابواب السما مفتوحة.
1- كنت زي باقي الناس "99%" كارهه علوم وعلوم صعبة ولو قابلت أى حد من صحابى هيقولي ليه عملتي في نفسك كدة .
2- علوم كانت الرغبة ال47 وال48 وكان قبلها بيطري ومجموعي جايب بيطري ورغم ذلك تشاء الاقدار اني ادخل علوم "اصل انا دفعة 2012 الدفعة النحس ".
3- الحمد لله دخلت الكلية وفي حد الله يكرمه استقبلني وكان جمبه واحدة مدبلره (عايدة السنة يعنى) عشان 3 درجات ودى كانت بداية مبشرة الصراحة ... عدي اول ترم وانا متأكدة اني مش هعدي ورغم ذلك عديت وبتقدير سبحان الله برده زمن المعجزات كنت كارهة الكلية وحاسة ان ده مش مكاني .
4- بس بعد اول ترم حسيت كأنها رسالة من ربنا "كان ساعتها بيقولي انا لسه واقف جنبك ولسه حلمك موجود.. انتي اسعي بس" وبعدها قررت اني احبها واتعايش معاها اكتر حاجة حبيتها في الكلية قسم الزوولوجى (الحيوان يعنى ؟!) وحلمت بيه والحمدلله ربنا كرمني بيه وحققلي حلمي ده كنت كل سنة بتحدي فيها نفسي والحمد لله كنت بثبت لنفسي اني اقوي من كل شئ.
5- صراحه علوم كانت اكبر نعمة في حياتي عرفتني بناس مكنتش اتخيل اني اعرفهم " ناس اشبه بالملايكة ... ربنا يرزقكم بناس زيهم وربنا يديمهم عليا نعمة".
6- انا دلوقتي اتخرجت من قسم حيوان / كيمياء وبتقدير كمان الحمد لله .
7- عايزة اقولكوا حاجة المرحلة اللي انتو فيها دي "مرحلة الجامعة" دي احلي مرحلة هتعيشها في حياتكوا .. حاولوا تعيشوا كل لحظة فيها .. متخلوش حياتكوا كلها كبت ومذاكرة ولا كلها لعب وفسح خير الامور الوسط اهم حاجة تعيش حياتك صح وتستغلها في سعادتك اجري ورا حلمك لان له مليون طريق ... متقفش عند طريق معين وتيأس ... اسعي واتعلم دايما وتأكد ان ربنا عمره ما يعمل حاجة وحشة لحد وان كنت مش عارفة قيمة الكلمتين دول دلوقتي تأكد انك هتعرفهم بعدين .
# ودي_تجروبتي
يشكر فريق الموقع صاحبه التجربه AmiRa Aziz Gamal
يُعتبرُ علمُ الكيمياء واحداً من العلومِ الطبيعيّة التي استعملَها الإنسانُ وبحثَ فيها منذُ القدم، وقد كان لهذا العلم في القديم دورٌ كبيرٌ جداً في العديدِ من المجالات التي كانت تَمَسُّ حياةَ الإنسانِ بشكلٍ مباشرٍ وحيويٍّ، وفي يومنا هذا لا زالَ لعلم الكيمياء أهميّته العظيمة في التّقدّمِ الحضاريِّ للدّولِ المختلفةِ
ليست هناك تعليقات:
إرسال تعليق