تحت مسمى "تجروبتى مع كليه العلوم" نشر العديد من الطلبه تجربتهم وخدوا شعار (# علوم_تتحب , # بص بعين تانيه) .... فأنت لو حابب تستفاد من أخطاء غيرك او تعمل حجات كان نفسنا نعملها وبننصحك بيها أقرأ عن التجربه للاخر.
بسم الله الرحمن الرحيم
- أنا هتكلم عن تجربتى الخاصه مع كليه العلوم كطالب لسه بيدرس ومش عارف مستقبله فين لسه.
- أنا هنا مش هتكلم عن مؤسسه كليه العلوم كجامعات لان كل جامعه ليها مميزاتها وعيوبها
لكن هتكلم عن كليه العلوم بصفه عامه.
- المهم انا طالب داخل الفرقه التالته ان شاء الله قسم فيزياء / كيمياء بجامعه دمنهور .
أولا: نبداء من اولى ولا اقولكم احسن نبداء من اول ما عرفت انى علوم
طبعا اللى يقولى كليه العلماء مبرووك ... واللى يقولى تمريض أحسن عشان هتلاقى وظيفه مستنياك وبفلوس حلوه كمان أنما فى علوم مش هتلاقى شغل ... واللى يقولى تربيه احسن عشان هتبقى مدرس ومش هتلاقى شغل ... وطبعا اللى يقولى مش هتقدر تمشى فيها عشان اصعب كليه ... وطبعا اللى قالى ان لازم لغتك تبقى انجليزى كويسه عشان تعرف تدرس
حجات كتير يعنى منها المحبط جدا ومنها الحلو جدا ... بس ف الحالتين كنت باخد الكلام من هنا واطلعه من هنا.
1- المهم قرأت عن الكليه كويس شوفت انا ممكن اكون ايه ف الكليه دى (غير معيد اللى مصر كلها نفسها تبقى معيد وخلاص ... هو كده وخلاص معيد واطلع الاول )
2- قرأت عن الاقسام طبعا قرأت عن الكيمياء والفيزياء والاقسام البيولوجيه زى ميكروو وحيوان ونبات وحشرات وحيوى
بص مش هوصف كم الذهول اللى كنت فيه ان كليه العلوم فيها كل ده ! ... فيها تشعبات واقسام اى حد يحلم بس يدخلها.
- القسم البيولوجى كله تابع للى كان علمى علوم.
- اما فى القسم الجيولوجى دا خاص بالرياضه وبالعلوم.
- اما قسم العلوم الطبيعيه يعنى اساسيات الكون هو لعلمى رياضه فقط.
علوم رياضه مش معنها انك هتدرس رياضه لا .... انت هتدرس فيزياء وكيمياء ورياضه وبرمجه وميكانيكا (بص من الاخر هتدرس اى ماده تخص الطبيعه)
- برضوا القسم المشترك الى مش موجود فى كل الجامعات وهو الفيزياء الحيويه ودا خاص لعلوم ولرياضه برضوا.
المهم لقيت ان كليه العلوم اكتر ما كنت اعرفها انها مجرد كليه زى اى كليه فيها قسمين تلاته وشكرا ... ودا مش مدح دا اللى لقيته عن الكليه بمجرد بحثى الصغير المحدود جدا عن كليه العلوم.
ندخل على الحياه العمليه بقى فى الكليه:
- نبداء بسنه اولى:
1- الموضوع بداء صعب فى الاول للامانه ... مواجهتك مع اللغه الانجليزيه مش معتمده نهائى على نتيجتك فى الثانوى (انا كنت جايب 46.5 ودا بالنسبه لدفعتى حلو مش وحش ف ثانوى).
2- المهم عديت المرحله دى بانى بدات المحاضره اللى اخدها اترجم اى كلمه فيها وبدات اتعرف ع الناس واصاحب فلان وفلان مش مصلحه طبعا بس لازم عشان نقدر نتكيف مع المكان ... بدات اترجم اى كلمه تقف ادامى واحده واحده بدات افهم سياق الماده واقدر افهم اى كلام مكتوب من خلال سياق الشرح.
3- طبعا بتسجل المحاضره دا ف الاول بس وتكتب كل كلمه عشان تواكب زمايلك.
4- صراحه اولى من اسهل السنين اللى هتعدى عليك بس هتبقى صعبه لانك فى مرحله جديده ولغه جديده وطريقه جديده فى الشرح ... والانترنت (مش الفيس ها) هيبقى دراعك اليمين وأى حاجه تقف معاك ادخل ودور واقراء عنها هتاخد فكره اوسع واشمل وهتعرف الموضوع اللى المحاضره بتتكلم عنه.
5- متقولش مش فاهم وتوصل لدرجه الاحباط , لا انت لو فضلت مكمل لمده شهر بس فى الكليه على انك مواظب وبتحاول تفهم مش مكبر دماغك وترمى المحاضرات وخلاص هتقدر تعدى المرحله دى بسلاسه جدا.
6- نصيحه بلاش السكه بتاعه عاوز اجيب من فلانه محاضره والكلام ده بتبقى مفقوسه وشكلك وحش.
7- لو هتضيع وقتك وهتعيش حياتك بيس اشطه والله عيش بس عدى أول شهر ده اكتب وسجل وروح البيت كل وروق حالك واقعد بيضها ... بيضها مش انك تنقلها زى ما هى بيضها يعنى تكتب تفاصيل اكتر عن اللى مكتوبه حجات موجوده ف الريكورد مش موجوده فى الكشكول او الكراسه بس يا سيدى مع قرايه لطيفه ليها وخلاص انت كده دخلت دماغك والله
واحده واحده هتاخد على الدكاتره واسلوبهم كان حلو هتاخد عليه وتحبه كان وحش هتاخد عليه وتتجنبه واوعى تخلى حد يكتبلك واوعى تستنى تاخد محاضرتك من حد هتضيع.
انا اتكلمت كتير عن اولى لانها اهم سنه وبالخصوص اول شهر ليك يا تكمل فيها وتعافر وتتعب(دا فى الاول بس بعد كده هتجيلك مناعه والله) يا اما تلم ورقك وتحول اى كليه تانيه (وهتذاكر فيها برضوا ).
8- فى اولى مطلوب تجيب تقدير او على حسب جامعتك بقا ونظامها ولازم تقرى عن نظام جامعتك كويس ... بس بينى وبينك هات تقدير بدل ما تتمرمط مرمطه السنين طول الكليه وتضطر تذاكر وتتعب اكتر عشان تلحق زمايلك ... هات تقدير فى اولى وبرضوا فى تانيه ولوحدك هتجيبه ف تالته ورابعه ان شاء الله.
9- طب لو لقدر الله شيلت ماده عادى جدا هتاخدها سمر ما تفكرش ان الحياه هتقف بس ابعد عن الموضوع ده وتجنبه.
شكر خاص من فريق الموقع لصاحب التجربه أحمد السيد
يُعتبرُ علمُ الكيمياء واحداً من العلومِ الطبيعيّة التي استعملَها الإنسانُ وبحثَ فيها منذُ القدم، وقد كان لهذا العلم في القديم دورٌ كبيرٌ جداً في العديدِ من المجالات التي كانت تَمَسُّ حياةَ الإنسانِ بشكلٍ مباشرٍ وحيويٍّ، وفي يومنا هذا لا زالَ لعلم الكيمياء أهميّته العظيمة في التّقدّمِ الحضاريِّ للدّولِ المختلفةِ
ليست هناك تعليقات:
إرسال تعليق