تفتكرو اية هية الخطوات اللي فاتت من البحث العلمي بالظبط؟ " فكرة .... سؤال .... خلفية علمية " والتلات خطوات دي معناها انك لسة على البر ... مجرد فكرة و سؤال و ابتديت تشوف في حد فكر زيك ولا لأ اية اخر الابحاث اللي وصل ليها الناس في موضوع فكرتك و اية هية النظريات و الابحاث المرتبطة بموضوع بحثك ، طب هندخل امتى في الشغل ؟
هقولك اهه .. طبعا انت من الخطوات اللي فاتت هتكون كونت خلفية علمية كبيرة عن موضوع بحثك تأهلك ان تتوقع النتيجة او شكل الحاجة اللي انت عايز توصلها ( الخطوة دية اسمها فرضيات البحث )
طب يعني اية فرضية ؟ و لية علشان اقول فرضية لازم اكون خلفية علمية الاول ؟
بص ياسيدي .... الفرضية هي عبارة عن النتيجة اللي انت متوقعها من بحثك او تجربتك .. او النتيجة اللي انت عايز توصلها ... او الحاجة اللي انت عايز تثبتها ببحثك ...
مثلا : "بيقولوا ان المحمول بيجيب سرطان في المخ ... طبعا دية مش فرضية علشان ما فيش فرضية بتبدا بكلمة بيقولوا"
دورك بقى: انك تبدا تكون خلفية علمية عن اية هية الموجات اللي بتطلع من التليفون المحمول و ترداداتها و خصائصها ... و اية هية الخلايا اللي ممكن تتاثر بالموجات دية ... بعد كدة تفرض فرضيتك ( ان الخلايا العصبية بتتاثر من الموجات الصادرة من المحمول ) و تحاول تثبت الموضوع دة من خلال تجاربك
نيجي بقى للنص التاني من السؤال : ليه لازم اكون خلفية علمية الاول ... ما ينفعش افرض الفرضية بعد السؤال علطول ... وأدور على اجابة و انا بكون خلفية علمية ؟
هقولك ... طبيعي علشان تفترض حل ... لازم تكون فاهم الموضوع كويس ازاي ؟... ما ينفعش تفرض ان مرض الانفلونزا ممكن يمكن علاجة بالطماطم الا لما يكون عندك معلومات كافية عن المرض و المقاومة و الفيرس المسبب للمرض و مكونات الطماطم و معلومات كتير عن الموضوع ... و دة اللي هيخليك تفرض الفرضية الصحيحة (( علشان هتكتشف ان فيتامين سي بيقاوم فايرس الانفلونزا ... و الفيتامين دة مش موجود في الطماطم ... و بالتالي هتدور على حاجة تانية في فيتامين سي و اشوف ازاي هتساعدني في مقاومة فيرس الانفلونزا ))
طيب .. تمام كدة ؟؟
اكتب فرضية ازاي
علشان تكتب فرضية لازم تكون عندك خلفية علمية ... و يكون عندك معلومات عن كل العوامل اللي بتاثر على التجربة يعني من الاخر عندك توقع للنتيجة اللي هتحصل .. و بتكتبها ( بس دة مش سحر ولا شعوذة ) هيجي بعدها في خطوة جاية .. دور التجربة اللي هتثبت بيها ان فرضيتك صح او غلط وبرضة لما تيجي تكتب الفرضية بتاعتك تاخد بالك من شوية عوامل و هية :
- لازم الفرضية توضع علاقة بين حاجتين ( مثلا كمية الضوء و انتاج الثمار )
- تكون مبنية على معلومات حصلت عليها من خلال بحثك في خطوة الخلفية العلمية.
- لازم الحاجتين اللي انا هدرس العلاقة بينهم في الفرضية اكون اقدر
o اقيسهم (( كمية الضوء = المدة الزمنية , انتاج الثمار = وزن المنتج من الشجرة ))
o عارف وحدات قياسهم (( كمية الضوء = الساعة , انتاج الثمار = الكيلوجرام ))
o اتحكم فيهم (( اقدر اتحكم في كمية الضوء اللي داخلة للنبات علشان اقيس انتاج الثمار ))
o اكون عارف اية هية الحاجات التانية اللي مكمن تاثر على انتاج الثمار و اثبتها (( اثبت كمية المية , نوع التربة , نوعية النبات , الاملاح الذائبة و الاسمدة في التربة ,........)
ملحوظة (( الحاجات اللي اتكلمنا عنها في النقاط السابقة دية اسمه المتغيرات ... و هنتكلم عنها بالتفصيل في موضوع لوحدها )
- نتائج التجربة تكون قادر على تمثيلها احصائيا (( يعني تقدر تطلع ارقام تعمل بيها رسم بياني )) , اللي هية عدد ساعات التعرض للضوء و كمية انتاج الثمار بالكيلو
- تكون قادر على اجراء التجارب للمتغيرات و عندك الوقت الكافي يعني محدد نوع النبات و الوقت اللي هتعمل في التجربة قد ايه.
برضة لو انت مبتدئ بلاش تفرض كذا فرضية في بعض ازاي يعني ؟؟
اقولك ياسيدي
مثلا تقول اثر الضوء على انتاج الثمار و سرعه النمو و جودة الثمار .... هتلاقي نفسك لما تيجي تعمل التجربة تاية و مش عارف تظبط متغيراتك و مش لاحق تقفل البحث بتاعك صح و في الحالة دية هتلاقي نفسك بتكروت و تعك
علشان كدة بقوللك تاني (( فرضيتك تكون علاقة بين متغيرين واضحين ))
اكيد دلوقتي جة في بالك سؤال مهم "هوة لازم انا اكون عارف الحل قبل ما افرض الفرضية ؟" قبل ما اجاوب عليك هقولك على انواع الفرضيات :
- فرضية طردية (( اكيد انت عارف العلاقة الطردية )) يعني كل ما حاجة بتزيت بتزيد قدامها الحاجة التانية (( ازود ضوء يزيد الانتاج ))
- فرضية عكسية (( برضة اكيد انت عارفها )) حاجة تزيد تنقص الحاجة التانية (( ازود ضوء يقل الانتاج ))
- فرضية تساؤلية (( يعني مش عارف نوع العلاقة ... طردية ولا عكسية ))
اكيد عرفت اجابة السؤال .....
طيب
تعال نضرب شوية امثلة و انت اكيد هتعرف انواع الفرضيات
- يفترض ان زيادة تعرض شجرة الطماطم لضوء الشمس يؤدي الى زيادة في وزن الانتاج
- يفترض ان زيادة تعرض شجرة الطماطم لضوء الشمس يؤدي الى نقصان في وزن الانتاج
- يفترض ان هناك علاقة بين كمية الضوء التي تتعرض لها شجرة الطماطم و وزن الانتاج
طبعا من غير ما اقولك اية انواع الفرضيات اللي في الامثلة انت عرفتها لوحدك .... اظن دلوقتي انت تقدر تصيغ فرضيتك بصورة كويسة.
نتقابل المرة الجاية و انت جاهز بفرضيتك ... تقعدو بالعافية (^_^) .
يُعتبرُ علمُ الكيمياء واحداً من العلومِ الطبيعيّة التي استعملَها الإنسانُ وبحثَ فيها منذُ القدم، وقد كان لهذا العلم في القديم دورٌ كبيرٌ جداً في العديدِ من المجالات التي كانت تَمَسُّ حياةَ الإنسانِ بشكلٍ مباشرٍ وحيويٍّ، وفي يومنا هذا لا زالَ لعلم الكيمياء أهميّته العظيمة في التّقدّمِ الحضاريِّ للدّولِ المختلفةِ
ليست هناك تعليقات:
إرسال تعليق