أولا هنبدأ الحاجات العامة اللى تهم كل الناس اللى شغالين فى كل المجالات فى المصانع المختلفة ثم هنبدأ نتدرج شوية شوية لحد ما نوصل للكورسات لبعض التخصصية اللى تهم كتير مننا بردو و هحاول على قد ما اقدر اشرح فى كل حلقة بمثال عملى موجود و الناس شغالين به علشان نقرب الكلام النظرى أكتر.
بسم الله الرحمن الرحيم
الحلقة العاشرة
و دى من الحلقات المهمه و موضوع الحلقة بتاعتنا عن نظام ادارة البيئة ISO 14000 .
ال ISO 14000 دى يا شباب عبارة عن مجموعة من المتطلبات اللى اتعملت سنة 2004 علشان نأسس بيها نظام ادراة بيئة _ EMA Environment Management System _ كويس و أى شركة عايزة تحافظ على منتجها و بيئة العمل فيها و صحة العاملين و المكان اللى هى موجودة فيه عموما بتحاول تطبق المتطلبات دى علشان تاخد شهادة الأيزو 14000 فى ادارة البيئة بشكل كويس و النظام دة يا شباب ممكن يتم تطبيقه على أى حاجة يحتمل انها تكون مصدر تلوث أو اى مكان أو مؤسسة أو شركة عايزة تقلل مصادر التلوث عندها او تحافظ على استمرارية الموارد البيئية اللى فيها او الى بتقوم عليها الصناعة بتاعتها بحيث تحقق افضل استخدام مع اقل درجة من التلوث الناتج عنها و دى فعلا فائدة كبيرة جدا للى يهتم بيها و هيخلى حاجات كتير فى مجتمعاتنا تتغير للأفضل.
اولا مزايا تطبيق متطلبات الايزو 14000 :-
1. بيحسن زى ما قلنا الأداء البيئي أو الممارسات اللى بتتم داخل المنشأة أو الشركة أو المؤسسة اللى بيتطبق فيها بحيث يحافظ على المنتج و العاملين و الشركة نفسها و المكان اللى هيا فيه .
2. بيحط اطار واضح جدا من الممارسات اللى بتساعدنى على تقليل التلوث فى البيئة من حولينا .
3. بيزود كفاءة الشركة من خلال العمل فى بيئة كويسة و بيوفر تكاليف ممكن اخسرها نتيجة العمل فى بيئة غير ملائمة ينتج عنها مشكلات فى المنتج او فى ال Man Power أو فى المنطقة المحيطة بالشركة.
4. بيزود اطمئنان المستهلك للمنتج بتاعى من خلال وضع ملاحظة على عبوة المنتج ان شركتى واخدة شهادة الأيزو 14000 فى ادارة البيئة و بالتالى بيزود الطلب على منتجى فى السوق و يزود ارباحى.
5. بيزود قدرات التوقع و التنبؤ بأى مشكلات بيئية سواء موجودة عندى و انا مش واخد بالى منها او ممكن تحصل مستقبلا علشان اتفاداها
6. بيحسن القدرة على ادارة الموارد البيئية بشكل عام و عدم الإسراف فى استهلاكها و تدميرها و خصوصا لو كانت موارد بيئية نادرة او شحيحة
7. بيخليني اتجنب حدوث مشاكل الحكومة او الجهات المسئولة نتيجة مشاكل مع جيرانى فى المنطقة اللى انا فيها لأنهم شايفين ان وجود شركتى خطر عليهم و بالتالى حصولى على الشهادة نظريا ممكن يطمنهم من ناحيتي و الجيران دول ممكن يكونوا مناطق سكنة او حتى مصانع بجوارى فى المنطقة الصناعية اللى أنا فيها .
و دلوقتى هنتكلم عن متطلبات الأيزو 14000 و كيفية تطبيقه :-
1- Management Commotment :- يعنى التزام الإدارة عن طريق وضع سياسة ادارة بيئية للشركة تحدد فيها اية اهدافها اللى عايزة توصلها من خلال تطبيق متطلبات ال ISO 14000 عندها يعنى مثلا تقليل التلوث و توفير تكاليف و زيادة الأمان البيئي و استخدام الموارد البيئية بشكل منظم يحافظ عليها و هكذا و نشر السياسة دى بين العاملين فى الشركة بحيث الكل يبقى على علم بيها و يشارك فى تطبيقها و بردو لازم تحتوى السياسة دى على التزام بالتطوير الدائم ليها و متابعة أى مستجدات على صناعتى و اضيفها باستمرار ثم الالتزام بكل ما جاء فيها دايما و تنفيذه.
2- Identification Of Environmental Aspects:- تعريف دقيق جدا بالتفصيل الممل لكل الجوانب البيئية و تأثيرها المطلوب ادارتها ادارة سليمة سواء كانت فى :- رقم واحد المنتج بتاعى مثلا عندنا مصنع انتاج مياة شرب معالجة معبأة عندى مخلفات كيماوية زى مخلفات المياة المستخدمة فى التنظيف و الغسيل للأرضيات و المستخدمة فى غسيل الفلاتر الرمل مثلا و الكربون فى عمليات ال Back Washing اليومية لتنظيف الفلاتر من أى عوالق و شوائب حجزتها و كمان الكيماويات المستخدمة فى اجراء الإختبارات على المياة كلها كيماويات خطيرة بيئيا فهيطلع لى فى الصرف الصحي كميات كبيرة من المياة غير نظيفة محملة بكميات رهيبة من المخلفات الكيماوية ... وعندى كمان المخلفات الفيزيائية زى مثلا عبوات تالفة او فارغة من عبوات المنتج أو كراتين أو شموع Cartridge Filters ( عارفينها اللى بتبقى فى فلاتر المية بتاع البيت دى ) أو عبوات فارغة من عبوات الكيماويات اللى داخلة عندى فى الصناعة بتاعتى جايبها من المورد و خلصت أى مخلفات لأى نشاط من لحام أو تقطيع أو فك و تركيب لقطع غيار لا تصلح مجددا للإستخدام و هكذا قيسوا على هذا أى مخلفات لأى صناعة تانية ... و ثانيا المجتمع اللى حوليا أو المنطقة المحيطة بشركتى هل هى منطقة سكنية و أنا مثلا هسبب لهم ضوضاء أو تلوث بأدخنة أو مخلفات الصناعة بتاعتى أيا كانت و لا انا مثلا مصنع مواد غذايئة و جمبي مصنع تانى لأنتاج الأسمنت أو منتجات البترول أو حتى الطوب الأحمر دة بنشوف مدخنة طول كدة شغالة دخان صبح و ليل و ليل و صبح و هتأثر بالتالى على صلاحية منتجى و هكذا .
3- Setting & Implementing Performance Targets :- يعنى أبدأ بعد ما حددت الجوانب البيئية اللى عندى و تأثيرها أبدأ أحط لها طرق متابعة و مواصفات علشان متخرجش عن الحد المسموح بيه فى القوانين المحلية للمكان اللى أنا شغال فيه و أشوف هتخلص منها ازاى ... و نبدأ بالمخلفات الفيزيائية لأنها سهلة كل اللى هعمله انى افصلها عن بعضها فى سلات مهملات مخصصة لكل نوع يعنى المخلفات الزجاجية لوحدها و الورقية لوحدها و البلاستيكية لوحدها و لو عندى مخلفات ذات خطورة عالية زى اطباق زراعة البكتريا Petri Dishes فى معامل الميكروبيولوجي بعملها سلة مهملات خاصة بيها و هكذا ... أحدد نوع المخلفات و افصلها لوحدها علشان يجي راجل متعهد تجميع المخلفات دى يشيلها يوديها تانى لمصانع تدوير المخلفات دى .
أما المخلفات الكيماوية لازم و حتما ولا بد نعمل فصل للمخلفات دى على قد ما نقدر يعنى مثلا المخلفات القلوية لوحدها و المخلفات الحامضية لوحدها دة فى حالة لو كنت فى المعمل مثلا و بتخلص من عينة بعد ما قستها و بعد كدة بردو بيجي راجل متعهد ياخد المخلفات اللى أنا فصلتها فى حاويات معلمها أنا إن دى حاوية مخلفات قلوية و دى حاوية مخلفات حامضية و بيروح يوديها مصانع معالجة مخصوصة بدل ما تروح فى الصرف الصحي العادي أو فى أى ترع أو مصارف أو مياة جارية و كدة زى الكوارث اللى بنشوفها ! و تأثر على البيئة أما لو كانت مياة بكمات ضخمة رايحة الصرف الصحي دى ملهاش غير انى اتابعها باختبار بيتعمل على مياة الصرف اسمه COD & BOD
Chemical Oxygen Demand & Biological Oxygen Demand))
1.Chemical Oxygen Demand :- هو كمية الأكسجين المستهلكة فى أكسدة المركبات العضوية لتحويلها الى مواد غير عضوية زى ( CO , SO2 , CO2 , NO NO2 , P2O ) و هكذا و دة بيعطيني اشارة على وجود مواد قابلة للتحلل تسبب لى تلوث فى المية و كلما قل الأكسجين فى الإختبار دة بيدل على زيادة الملوثات العضوية و ارتفاع نسبتها فى المية و فى الحالة دى بعمل اجراء تصحيحى Corrective Action علشان اقلل كمية الملوثات العضوية اللى عندى للحد الأدني على قد ما اقدر بحيث لما المية تروح لمحطات معالجة مياة االصرف الصحي الحكومية تكون محتاجة معالجة بسيطة و بالتالى ابقى ساهمت بشكل فعال فى حماية البيئة عندى و فى المنطقة اللى انا فيها.
2. Biological Oxygen Demand :- و دة اختبار بنعمله علشان نعرف منه الملوثات الحيوية فى المية زى البكتريا اللى بتستهلك الأكسجين فى نشاطها الحيوى و كلما قلت كمية الأكسجين بيعطيني دليل على وجود بكتريا كتير فى مياة الصرف عندى و على أساسها بردو باخد اجراء تصحيحي بإنى اقلل كمية البكتيريا الموجودة فى مياة الصرف عندى و دة بيتم من خلال السيطرة على عمليات الانتاج من البداية و الاهتمام بنظافة المكان كويس جدا و هكذا و يا حبذا لو المصنع اللى أنا فيه يكون فيه محطة لمعالجة مياة الصرف الصناعى و الصحي للمصنع و دى حاجة لذيذة جدا كمجال شغل.
5- Work Instructions :- يعنى ببدأ اجيب كل الكلام اللى فوق دة و ارتبه فى تعليمات شغل و اوزعها للناس علشان يبقى ملزم للجميع و بالتالى اضمن تفاعل العاملين معايا و مشاركتهم فى تطبيق التزامات ادارة البيئة بشكل فعال و اعقد لهم دورات تدريبية بشكل دورى و منتظم علشان يبقوا على علم و اتصال مستمر بالمتطلبات دى و لو فيه تطوير أعممه عليهم علشان كله يبقى فى الصورة النهائية من التعليمات دى و يتم تنفيذها بكفاءة.
6- Establishing Periodically Auditing Program :- يعنى تأسيس نظام مراجعة و تقييم داخلى لنظام ال ISO 14000 علشان اشوف اذا كان بيتم تطبيقه بصورة كويسة ولا لأ و هل العاملين عندى فاهمينه كويس و فاهمين متطلباته ولا لأ عن طريق انى احط كل الجوانب اللى فوق دى فى Check List كدة يعنى قائمة مراجعة فيها كل الجوانب البيئية المحتملة عندى و اقسمها بقى ( موارد ، ملوثات ، آثار جانبية ، ... ) و أبدأ احط تحت كل نوع منهم الحاجات اللى بتندرج تحته و ليها علاقة بيه و مكان وجودها فى المصنع و نوع تأثيرها ايجابي ولا سلبي و ططرق مراقبتها و التحكم فيها و هل مطبقة ولا فيها اهمال و هكذا و أمر على المصنع كله بالقائمة دى لحد ما اغطي كل الجوانب دى علشان اقيمها بعدين فى اجتماع الإدارة.
7- Periodic Reviews By Top Management:- هنا بقى مع الإدارة بتاعة المصنع ببدأ اشوف النتائج اللى وصلت ليها بعد التقييم دة هل هى مرضية ولا فى جوانب تقصير لازم أبدأ اعالجه أو اشوف لو كان فيه جوانب بيئية لم يتم تغطيتها فى النظام عندى سواء تم نسيانها او طرأت فى أى تجديد أبدأ اضيفها عندى و أوفر الإمكانيات اللازمة لمراقبتها و اضيفها فى سياسة الشركة البيئية و اعمل توعية بيها و هكذا على طول افضل اقيم نفسي و اشوف انا فين من تطبيق النظام دة عندى فى الشركة .
آية الحلقة :- يقول الله عز و جل :- { لَّا خَيْرَ فِي كَثِيرٍ مِّن نَّجْوَاهُمْ إِلَّا مَنْ أَمَرَ بِصَدَقَةٍ أَوْ مَعْرُوفٍ أَوْ إِصْلَاحٍ بَيْنَ النَّاسِ ۚ وَمَن يَفْعَلْ ذَٰلِكَ ابْتِغَاءَ مَرْضَاتِ اللَّهِ فَسَوْفَ نُؤْتِيهِ أَجْرًا عَظِيمًا (114) } سورة النساء
يُعتبرُ علمُ الكيمياء واحداً من العلومِ الطبيعيّة التي استعملَها الإنسانُ وبحثَ فيها منذُ القدم، وقد كان لهذا العلم في القديم دورٌ كبيرٌ جداً في العديدِ من المجالات التي كانت تَمَسُّ حياةَ الإنسانِ بشكلٍ مباشرٍ وحيويٍّ، وفي يومنا هذا لا زالَ لعلم الكيمياء أهميّته العظيمة في التّقدّمِ الحضاريِّ للدّولِ المختلفةِ
ليست هناك تعليقات:
إرسال تعليق